SRI AMAN: Perintah semampai ngarapka genap projek ke dipejalai ulih meri penguntung enggau pemanah ngagai semua rayat.
Sapit Menteri Dagang Dalam Nengeri, Koperasi enggau Pekara Bebelika Barang Malaysia, Datuk Rohani Abdul Karim madah, nadai nguna genap projek ke diperambu enggau ke udah dipejalaika ngasuh kaul penyerakup pechah sereta enda ngelantangka ati ngagai semua piak.
“ Konsep Menteri Besai, Rayat Dipelamati Pemansang Dikemerat aruh dikemeran ngambika rayat ulih ngasaika penguntung ari atur pemansang ba genap projek, ti enda bangat nguntungka sepiak raban aja,” ku iya.
Iya ke mega Kaban Parlimen Batang Lupar bejaku munyi nya ba pengerami Tuai Begulai enggau Rayat ba Rumah Sabai, Kampung Batu 8, Pusa, ditu bedau lama tu ke udah.
Ku iya, iya ke bendar perintah endang ngarapka semua projek ke udah diperambu dipejalai enggau manah sereta ulih meri penguntung ngagai semua rayat, tang ukai semina ngunrtungka sekeda raban.
Tandu Rohani, konsep PM nyata bendar udah ditemu iya nya Rayat Dipelamati Pemansang Dikemerat.
Terang iya, genap projek ke diperambu perintah iya nya perengka guna ti meri pemaik ke rayat.
Piak ke beempu tanggungpengawaba pekara nya aruh bejalaika projek nya enggau manah sereta lanchar,” ku iya.
Ku iya baru, tegal bisi pengelemi enggau penekul, isu-isu pemansang suah didinga ti enda nemu ngetu.
Beduduk enggau nya, Rohani ngarapka semua piak aruh besaup sereta bekerejasama ngambika semua projek pemansang ulih diatur enggau mujur.
Ku iya, tuai raban bansa enggau Komiti Pemansang enggau Pengelikun Genturung Pendiau (JKKK) seruran matau pejalai projek ke diatur ngambika ulih tetapika peminta rayat.
“Kitai enggau sekeda raban beambi ulih ari penyarut ke nyadi antara diri sama diri ti ngujungka rayat empu ke napi penanggul.
“Perintah endang ngarapka semua projek ke di[ejalai ulih tembu nitihka timpuh tang ukai napi sebarang penanggul.
“Tu meh utai dikenggaika kitai laban rayat semampai mantaika isu-isu nya,” ku iya.
Nyerumba enggau nya mega, Rohani ngelalau rayat ngambika majak nyukung tuai ke diatu tang enda kiruh pechayaka sebarang isu ke dibantaika penyakal.
Piak penyakal, ku iya, endang sengaja ngiga pengelemi perintah ngambika bisi dijadika isu maya bekimpin nyerumba pengawa bepilih besai tu.
Sama datai ba pengerami nya Sekretari Kanan iya, Safuidin Matsah, bala tuai raban bansa enggau peranak rumah panjai ke bukai.