KUCHING: Parti Pekereja Sarawak (SWP) nyauka diselampur temu magang nama bagi chalun ke deka bediri ba enam sitak parlimen dalam pengawa bepilih besai Ke -13(PRU-13) ila.
Taja pan parti nya naka ke diatu baru udah nebah nama chalun sida ungkup parlimen Julau enggau Hulu Rajang tang bisi mega berita ke mansa pending chalun ke ditagaka ungkup Lubok Antu enggau Selangau udah mega temu.
SWP udah nebah Kaban Kunsil Nengeri (ADUN) Meluan Wong Judat ungkup parlimen Julau seraya Mandal Presiden ke lalu nyadi ADUN Pelagus George Lagong deka disabung ba Hulu Rajang.
Penerang berita madah, kelimpah ari dua iku nya, Datuk Sng Chee Hua enggau anak iya Larry Sng udah nyendiaka tambai enggau pelekat parti lalu enti bepelasarka tu udah tentu meri penetap seduai iya deka mega disabung dalam PRU-13.
Tandu penerang berita nya Dato Sng, MP Julau enggau ADUN Pelagus ke dulu suba, deka betapi ngelaban Sapit Presiden Parti rayat Sarawak (PRS) Datuk Joseph Entulu anak Belaun di Selangau seraya Larry Sng ke lalu nyadi presiden SWP deka betapi enggau William Nyallau Badak ba Lubok Antu.
Kemari maya ke deka ngesahka pekara tu ari Larry tang puntan.