NGENATAIKA SUKUNG: Chin Nyuaka tabung bantu ari SUPP ngagai Roslan kemari.
KUCHING: Parti Sa’ati Rayat Sarawak (SUPP) ngenataika sukung ngagai raban polis sereta soldadu Malaysia ti benung bejalaika tanggungpengawa napi keruga raban soldadu penyelawai Kesultanan Sulu Di Lahad Datu, Sabah.
Presiden SUPP Dato Sri Peter Chin Fah Kui madahka raban polis enggau soldadu diatu benung berambunka nyawa ngambika menua Malaysia mengkang merdeka sereta likun.
“SUPP kesal ketegal menua Lahad Datu dikeruga raban soldadu penyelawai Kesultanan Sulu ti udah datai ngerempuh enggau enda beradat melakangka undang-undang antarabangsa.
“Keruga munsuh tu ngujungka raban polis kitai ke nyengkaum seiku ari Kampung Tebakang Dayak, Serian ASP Michael Padel midang,’ku iya ba sebengkah pengawa mandangka sukung ngagai polis ti diatur di Komplek Dagang Temuai Sarawak ditu, kemari.
Ku iya, pengawa SUPP kemari ti diuluka raban Pemuda enggau Wanita begulai enggau mensia mayuh semampai nyukung sereta besampika pengelikun raban polis enggau soldadu ti benung bejalaika tanggungpengawa ngalahka munsuh.
“Pengawa gempuru SUPP begulai enggau polis lemai tu deka ngenataika pesan ngagai perintah Sulu dia rayat Malaysia sereta kami ke diau di mengeri Kuching tu enda sekali deka nundukka pinta sida iya lalu deka semampai meri sukung ngagai polis enggau sedadu Malaysia,”ku iya.
Ngarika SUPP, Chin mega ngenataika penyinu ati ngagai ruang bilik raban polis ti udah midang.
Ba pengawanya, SUPP (Chin) mega nyauka bantu RM5,000 pemeri mensia mayuh ngagai polis ti diterima Kepala Polis Pelilih Kuching ACP Roslan Bek.
SUPP lemai nya mega ngaga riput polis mantah penerang ti dipansutka Mandal Presiden Parti Keadilan Rakyat (PKR) Tian Chua ti nuduh insiden ke nyadi di Lahad Datu ti udah nabanka 8 iku nyawa polis siti ari ulah ti dikena BN-UMNO ngemba rayat.