Wednesday, January 19

Tanka maruah enggau rega diri

0

Anang muntang ‘dibeli’ enggau duit ringgit laban nya semina umpan

KANOWIT: Raban bansa Dayak dilalau ngambika enda muntang ‘dibeli’ enggau duit ringgit ari sekeda raban maya Pengawa Pepilih Besai Ke-13 (PRU13) tu ila.

Menteri Pemansang Tanah Tan Sri Dr James Jemut Masing madah, raban bansa Dayak aruh ngetanka maruah diri sereta enda muntang disapi enggau duit ringgit ke nyadi ‘umpan’ sekeda raban kena ngulihka undi.

“Ni naka pemayuh duit ke diberi sida nya enti ulih dibanding enggau penyampau projek pemansang ke deka dipejalaika perintah Barisan Nasional (BN) jemah.

“Penyampau duit ke diberi nya enda ulih dibanding enggau rega pemansang ke dibai perintah BN.

“Nya alai, anang ketegal duit ringgit ke diberi raban nya, kita lalu salah sunting tauka salah pilih maya PRU13 tu ti tau mai pengerugi diri jemah ila,” ku iya.

Iya bejaku munyi nya maya bejadika pengerami ‘Malam Mesra BN’ Parlimen P.210 Kanowit ke diatur ba Dewan Opis Pelilih Menua Kanowit ditu, malam kemari.

Sama bisi datai Sapit Speaker Dewan Negara Senator Datuk Doris Sophia Brodie, Menteri Muda Pemansang Tanah enggau Menteri Muda Dagang Temuai Datuk Gramong Juna, Menteri Muda ba Opis Kepala Menteri (Pekara Adat Bumiputera enggau Penan) Datuk John Sikie Tayai sereta Sekretari Besai Parti Rayat Sarawak (PRS) Datuk Wilfred Rata Nissom.

Bisi datai mega, Kaban Parlimen Kanowit Datuk Aaron Ago Dagang, Kaban Kunsil Nengeri (ADUN) Ngemah Alexander Vincent sereta tiga Sekretari Politik Kepala Menteri iya nya Maurice Giri, Wilson Nyabong Ijang enggau Richard Will.

Masing ke mega Presiden PRS madah, raban nya dipelabaka deka ngena chara duit dalam politik sida nyengkaum ba Kanowit kena ngelaburka mata rayat.

“PRS ditu (Kanowit) deka betangkup enggau Parti Pekereja Sarawak (SWP) maya PRU13 tu. Nya alai, rayat di Kanowit kelebih agi bansa Dayak aruh beati-ati enggau penatai SWP kitu lalu anang muntang makai danji manis ke diberi sida.

Ku iya, Kanowit agi begunaka BN ngambika majak mansang lalu anang muai awak ungkup nembiak rebak baru. Kitai mesti bisi maruah enggau rega diri.

“Berunding meh enggau panjai laban kitai idup ukai sehari dua laban mayuh agi pemansang dikedekaka kitai ari BN,” ku iya ke nyadi ADUN Baleh.

Beduduk enggau nya, Masing minta raban ketuai ba Kanowit semampai ngemaruhka diri maya bejalaika pengawa ke rayat.

Tu beguna bendar, kena ngambi ati rayat sereta ngulihka sukung (undi) ke mayuh ari raban penyukung parti.

“Nyadi wakil rayat ukai ngema ma ke lempung. Rayat sigi ‘bos’ kitai. Nyadi ketuai, kitai aruh ngemaruhka diri sereta landik ngambi ati rayat.

“Mayuh agi orang rindu ke kita, mayuh agi undi ke diulih. Tu laban pemujur wakil rayat bepanggai ba undi ke mayuh,” ku iya.

Masing bepenemu, enda rugi enti seseiku wakil rayat seruran ngemaruhka diri ngagai rayat laban penguntung chukup besai iya nya teulihka undi mayuh.

Berindik ari nya, iya minta rayat ba Kanowit nyukung BN maya PRU13 ila.

“Aku pechaya, Kanowit kubu kuat BN lalu kitai patut ngetanka iya. Rayat ba Kanowit aruh beserakup enggau pangan diri ngambika BN mujur,” ku iya.