MIRI: Penyamun nyelawai ari Sulu ke tama enda beradat di Lahad Datu Sabah udah ngenegapka kaul sereta pemereti ati antara rayat ari mayuh raban bansa enggau asal penatai.
Sekretari Politik Menteri Kuasa, Teknologi Gadung enggau Ai, Datuk Sebastian Ting madah, penyerakup nya ulih dipeda lebuh rayat begempung nyukung perintah ngelaban munsuh.
“Chunto iya kitai udah beserakup, meri pengarap ke enda begilik ngagai perintah dalam pengawa ngelaban munsuh di Lahad Datu,” ku iya bejaku ba Pengerami Nyambut Chap Goh Meh Kandang menua Rukun Tetangga Desa Senadin Fasa 1 malam kemari.
Iya mega meransang apai indai ngambika nganjung anak sida ngagai Tabika ke ngembuan anak mit ari mayuh raban bansa awakka tau nerenak pemereti ati enggau penyerakup bepun ari umur biak.
Maya nya mega, iya meransang mayuh agi RT enggau Tabika Perpaduan ditumbuhka di kandang endur baru ke dikemata JPNIN.
Bela bisi ngulu atur pengawa nya Penulung Pemesai JPNIN, Ikhwan Mohamad Hanapi, Chairman Pengatur Pengawa, Richard Liew, enggau Chairman KRT Desa Senadin Fasa 1, Willie Lijla Deseh.