Thursday, September 19

Pemutus pengawa bepilih 2011 patut ke lalau

0
KAMI NYUKUNG: Peranak ari Genturung Pendiau Iban Kudei Baru bela meri sukung ngagai BN. Bela bisi ayan, Sidu (tengah) enggau Wilfred (dua ari kiba).

KAMI NYUKUNG: Peranak ari Genturung Pendiau Iban Kudei Baru bela meri sukung ngagai BN. Bela bisi ayan, Sidu (tengah) enggau Wilfred (dua ari kiba).

Semua peranak Genturung Pendiau Iban Kudei Baru dilalau nyukung pengari BN

KUCHING: Pemutus pengawa bepilih taun 2011 ke alai DUN Batu Kawa dirampas parti penyakal tau bendar nyadika chunto sereta lalau ngagai rayat ngambika berunding panjai sebedau  muai undi maya pengawa bepilih ti deka datai tu.

Berindik ari nya, Pengulu Sidu John (Zon Batu Kawa) ngelalau rayat ke diau ba Genturung Pendiau Iban Kudei Baru begempung ngenegapka sukung ngagai Barisan Nasional (BN) maya pengawa bepilih besai (PRU13) ti deka datai tu.

“Pekara ke udah nyadi maya bepilih taun 2011 nya tau nyadika lalau ngagai kitai semua. BN semina alah 500 undi maya nya, lalu diatu nama utai diulih kitai?

“Kitai patut berunding panjai maya PRU13, anang salah pilih lalu tetapka sukung ngagai BN dikena ngemeran pengelantang pengidup kitai jemah ila,” ku iya.

Iya mansutka jaku tu maya ngulu pengerami ngintu penumbuh Gerempung Orang Indu Kampung Kudei Baru (Iban) genap dua taun malam ensanus.

Ku iya, perintah BN udah meri macham bantu ungkup pengelantang rayat ke nyengkaum BR1M, bantu RM100 ngagai nembiak sekula sereta program bantu bukai.

“Ngambika kitai mengkang nerima program bantu tu dudi ila, undi meh pengari BN maya pengawa bepilih parlimen ungkup sitak Stampin tu ila,” ku iya.

Nyerumba pengerami nya, Sidu nyukung Wilfred Yap nyadi chalun BN-SUPP ti bela bisi datai begulai enggau mensia mayuh.

Wilfred Yap disadang deka bediri ngenanka sitak parlimen Stampin nganti Datuk Yong Khoon Seng ti madahka diri enda bediri agi.