SIBU: Seiku nembiak indu, 16, ngaga riput polis nyepi diri kena gap seiku lelaki udah bekau bebakih enggau iya ba Facebook mujur ngumbuk iya ngambi 63 iti gambar ganjang iya udah nya dikirum ngagai lelaki nya.
Indu ari Kemuyang bekelala enggau lelaki nya taun nyin kemari nyau kelama lalu besilih lumur telefon.
Iya madahka ngagai polis lelaki nya minta iya begambar ganjang lalu dikirum ngagai iya.
Ku iya keterubah ditulak tang udah ke kena pujuk kelengah-lengah lalu setuju.
Bulan nyin tadi, lelaki nya dipechaya ari Kuala Lumpur, minta indu nya meli kredit RM10 ungkup telefon iya udah nya madahka deka madamka siti gambar disilih enggau sekali kredit.
Tang dalam pun bulan tu tadi iya minta RM1,000 ari nembiak indu ke benung besekula nya lalu ngegap deka ngayanka gambar ganjang iya enti pinta iya enda ditunai.
Tudah indu nya nyimpan RM300 ngagai akaun bank lelaki nya kena 3 March tu tadi udah nya ngaga riput polis.