LUBOK ANTU: Parti Demokratik Progresif Sarawak (SPDP) Pampang Batang Ai enggau naka ulih deka mantu pengari sitak parlimen Lubok Antu William Nyalau anak Badak maya Pengawa Bepilih Besai ti Ke-13 (PRU13) tu ila.
Sekretari SPDP pampang Batang Ai Kr Jimbat @ Abeng madah, semua kaban parti tu ditu deka bebendar begulai enggau kaban parti bukai dalam gempung Barisan Nasional (BN) deka penapat gawa ngambika pemujur pengari parti nya Nyalau ulih japai maya PRU13 ti deka diatur enda lama agi.
Iya madah, peranak menua ba sitak Parlimen Lubok Antu agi begunaka pengari BN mantu sida ngatur pemansang tambah mega Nyalau muntang dibai berandau sereta rajin gawa mutarka penanggul rayat ditu (Lubok Antu).
“Taja pan Nyalau ari Parti Rayat Sarawak (PRS) tang kami ari SPDP begulai enggau parti bukai dalam gempung BN iya nya Parti Pesaka Bumiputera Bersatu (PBB) enggau Parti Sa’ati Rayat Sarawak (SUPP) deka bebendar besaup gawa ngambika Nyalau mujur maya PRU13 tu ila,” ku iya nyerita ngagai Utusan Borneo ditu kilah ensana.
Maya PRU13 tu, pengari BN nyangka deka berapi enggau Parti Pekereja Sarawak (SWP) sereta Parti Keadilan Rakyat (PKR).
Kr Jimbat ke mega orang tegap Nyalau madah, pengundi ba sitak Lubok Antu deka meda peranak menua tu empu dipilih nyadi pengari rayat ngarika sida.
Enti nyadi presiden SWP Larry Sng betapi enggau Nyalau ba sitak ke diuan tebal bansa Iban, dia sida deka ngenukuka Larry pulai mai mua malu, ku iya.
“Kami dekaka anak lati Iban ngarika BN nyadi pengari rayat ditu, ukai Larry ari Kapit,” tandu iya.
Maya PRU12 suba, Nyalau (BN) menang sereta teulihka 6,769 undi ngalahka Nicholas Bawin anak Anggat (Bebas) ke bulih 5,159 undi. BN menang enggau pengelui 1,610 undi.