Thursday, September 19

Perintah BN enda nyiping ngungkupka pemansang

0
PENGGI NUAN: TR Janting (empat kiba) nyuaka tepa ngagai Aaron sepengudah ngulu pengerami ba rumah panjai iya di Nanga Ape, Ulu Poi ditu, empai lama ke udah.

PENGGI NUAN: TR Janting (empat kiba) nyuaka tepa ngagai Aaron sepengudah ngulu pengerami ba rumah panjai iya di Nanga Ape, Ulu Poi ditu, empai lama ke udah.

KANOWIT: Perintah enda nyiping lebuh ngungkupka pemansang baik nya ba kandang mengeri tauka ba menua pesisir.

Kaban Parlimen Kanowit Datuk Aaron Ago Dagang madah, perintah naka ulih ngatur projek pemansang ba menua pesisir ngambika rayat bela ngasaika pemujur pegai perintah Barisan Nasional (BN).

“Berindik ari pengemerat pekara tu ke rayat, diatu kitai meda menua kitai udah jauh mansang lalu mungkur rumah panjai di menua pesisir enggau di ulu entigis,” ku iya.

Iya mantaika jaku nya maya ngulu Pengerami Ketuai Begulai enggau Rayat di Rumah Janting, Nanga Ape, Ulu Poi ditu, empai lama ke udah.

Sehari nya mega, iya ngulu pengerami ke sebaka ba Rumah Sangga, Rumah Balai enggau bejadika projek injin api di Rumah Alih ba Ulu Poi.

Nampung jaku iya, ku Aaron, rayat mega enda tau nyalahka pengari rayat nyema rumah panjai sida laun nerima pemansang.

Ku iya, semua menua deka dipenggika pemansang magang tang ketegal menua tu besai nya alai pemansang bisi laun datai.

“Pengari rayat enda gawa ba siti menua aja, nya alai rayat aruh besabar nganti idar menua sida diberi projek pemansang.

“Ketegal tu mega, kita (rayat) anang guai ringgat lalu mantup pekara nya ngagai raban ti ngenggaika perintah laban sida landik agi ngelagu sesebengkah pekara ba tuju ngachuk runding rayat,” pia ku iya madahka baru.

Aaron madah, kelai pementas perintah BN ngagai rayat udah mayuh dipeda nyengkaum ngaga projek Jalai Ulu Machan, projek letrik kelimpah ari paip ai ke benung digaga.

Berindik ari pekara nya, ku iya, rayat aruh nemu bejadika pemansang nya dikena ngangkatka tikas pengidup diri.

“Kena projek ke diberi perintah enggau landik ngambika pengidup kitai tau nginsur ngagai menalan ti manah agi,” ku iya ngujungka jaku maya nya.