Rayat menua pesisir dilalau enda tebiuh tegal jaku asut

0

LUBOK ANTU: Rayat menua pesisir dalam pelilih mit tu dilalau ngambika enda mudah tebiuh runding tegal jaku asut parti penyakal baka Parti Pekereja Sarawak (SWP) enggau Parti Keadilan Rakyat (PKR) kena ngulihka sukung politik maya pengawa bepilih besai (PRU) Ke-13 ila.

Kaban Parlimen Lubok Antu William Nyalau anak Badak madah, rayat menua pesisir enda muntang tebiuh enggau asut SWP enggau PKR laban nya semina chara sida ngulihka sukung ba tuju ngutungka diri aja.

“Parti penyakal tu naburka petenah sereta ngasut kita (rayat) bekaul enggau pekara ke jai senentang perintah Barisan Nasional (BN) ngambika sida teulihka sukung maya PRU tu ila.

“Enti sema utai tu amat nyadi, kita dikearapka enda muntang tebiuh enggau jaku asut sida tu,” ku iya.

Iya bejaku munyi nya ba pengerami Pemesai Begulai enggau Rayat ba Rumah Intunie Nyato Atas, ditu, kemari.

Tandu iya, pengawa nyukung SWP enggau PKR tu endang meri pengerugi ngagai kita laban penyakal enda ulih mai pemansang ke rayat ba menua tu.

“Kita aruh beterima kasih ngagai perintah laban udah bejalaika mayuh projek pemansang sereta ngangkatka tikas pengidup kita ngelama tu,” ku iya.

Beduduk ari nya, Nyalau arapka rayat Lubok Antu terus meri sukung ke kering ngagai BN ngambika perambu projek pemasang ulih dipejalaika enggau mujur ba pelilih menua tu.

Sama bisi datai, Pemesai Pemadah Parlimen JASA P.203 Lubok Antu Geoffery Baja anak Ricky Maba, Pemantu Luar Kanan JASA Engkilili, Edwin Ancheh enggau bala tuai raban bansa ke bukai ari pelilih menua Lubok Antu.