Tuesday, February 7

SWP nyuaka duit insuran ngagai empat buah ruang bilik

2

KUCHING: Parti Pekereja Sarawak (SWP) ngamatka semaya ba pekara sekim insuran raban dalam parti sepengudah nyuaka bayar insuran sepenyampau RM10,000 ngagai empat buah ruang bilik di Engkelili.

Presiden SWP Larry Sng nyuaka duit nya ngagai Gani Gerang, anak niang Gerang Sulang ke nadai maya ke beumur 69 taun.

Iya mega nyuaka RM2,500 ngagai Klanang Malin, anak niang Malin Selan ke nadai maya beumur 72 taun enggau Enchang Ajai, laki niang Bangan Tugong ke nadai maya beumur 51 taun.

Mandal Presiden Kanan I, Josephine Mawat nyuaka RM2,500 ngagai niang Nyanggau Cherang sebilik di Sekim Skrang ti udah nadai kena hari Lima tu tadi.

“SWP nyadi sebengkah parti politik di Sarawak ti meri insuran ngagai raban dalam parti nya.

“Parti nerima mayuh pinta nyadi kaban SWP ke alai raban deka berengkah dibungkur insuran sepengudah tiga bulan dalam parti,” ku Larry.

Raban parti deka dibungkur insuran 24 jam ba sebarang alai aja nengah Multipurpose Insurance Bhd ungkup raban ti udah ngerejister enda kurang ari tiga bulan.

Polisi insuran nya nyendia duit pampas RM12,500 enti mati ketegal penusah bebadi, RM2,500 enti mati sakit sereta nyengkaum timpang ba sebelah tubuh.

Insuran penusah bebadi semina sah ungkup raban ti beumur 18 ngagai 75 taun.

Larry mega madahka kaban ke beumur ngelui ari nya ti enda nerima polisi insuran deka diberi bantu bukai ngambika ulih ngelempung tating sida sebilik ke napi penusah.