Sepenyampau RM11,993,000 udah diagihka perintah kena nyungkakka tikas sosioekonomi rayat
SARATOK: Perintah ngungkupka belanja sepenyampau RM11,993,000 dikena ngemansangka pengawa nanam getah ba kandang menua sitak Parlimen Saratok.
Sapit Menteri Pengangkut Jelaing Mersat madahka,projek nanam getah ti bisi kualiti ngena chara betumpuk nya dipejalaika Opis Betanam Betupi Nengeri Sarawak, ti mega sebengkah ari program transformasi, Palan Pugu Ekonomi Bansa (NKEA).
Ku iya, ba sitak Parlimen Saratok nyentuk ke seharitu bisi 238 iku penyereta projek sereta dipelabaka deka nambah berindik ari raban bansa udah meretika pengawa betanamka getah ulih nyungkakka tikas sosioekonomi sida jemah ila.
“Pun taun tu aja,bisi 1,000 hektar tanah ke diempu peranak sitak Parlimen tu udah ngerejister sereta deka ngemannsangka tanah sida nengah program tu ti udah masuk ba renggat keterubah, ti mungkur sekeda endur di Ulu Sebetan,Empelaie, Awas, Bila Dua, Sungai Bangkong enggau pemadu baru di Lengain.
“Kitai andal program tu ulih ngangkatka tikas idup sereta ngemansutka kitai ari penyeranta, lebih agi ti diau di menua pesisir,” ku iya ti nyadi Kaban Parlimen Saratok.
Iya mansutka pekara nya ngagai pemberita, pengudah bejadika pengawa nasih tanah “Rubber Block Planting” (RBP) di Rumah Nicholas Egai, Lengain ditu, kemari.
Tandu iya, projek nya sebengkah chara ke panjai ari perintah Barisan Nasional (BN) nyikap raban bansa menua pesisir betapi enggau pemansang ubah dunya enggau juluk menua ti deka nyadi menua maju maya manggai Wawasan 2020.
“Kitai ngarapka raban bansa ulih ngerebut peluang ti disediaka perintah, dikena ngemajuka diri empu ngambika enda tinggal.
“Anang muntang teparuk enggau berita selebubu ti selalu deka bejaika pemansang ti dipejalaika perintah,” ku iya.
Bepelasarka pansik orang ti bekaul, nanam getah ti bisi kualiti deka ngeluarka asil keterubah maya ulur getah nya enam taun udah ditanam.
Dipelabaka sehektar endur nanam getah nya ulih ngeluarka asil urung RM1,500 sebulan.
Nya alai ku Jelaing, raban bansa patut ulih meratika pengawa nanam getah ulih nyungkakka penatai pemisi sereta peluang ke manah ti patut direbut.
“Semua ti dipejalaika perintah Barisan Nasional, endang dikemeratka ungkup rayat ngambika ulih besemekih enggau ubah dunya.
“Kita (rayat) patut berasai temegah ati laban ngasaika pemansang enggau pengelantang baka ti diasaika seharitu, anang alah keruga sekeda orang ti semina nemu besemaya tang bula,” ku iya.