Sunday, October 20

Perintah seruran ngenataika peminta ke disemaya ngagai rayat, ku Rohani

0

SRI AMAN: Kaban Parlimen Batang Lupar, Datuk Rohani Abdul Karim madah, perintah Barisan Nasional (BN) nadai kala ngemulaka rayat laban semua semaya ari perintah BN ngelama tu dikenataika magang.

Ku iya, perintah BN bepegai ba polisi deka ngemansang sereta ngintu pengidup rayat, ukai deka ngemulaka rayat.

“ Kami enggai dikumbai orang semina nemu bejaku aja, nya alai semua pekara ti disemayaka ngelama tu tetap dititihka kami ,” ku iya lebuh ti brandau enggau pengarang berita ari Utusan Borneo sepenembu nutup pengerami ‘Astro Fiesta Mesra Belia’ Parlimen Batang Lupar ba Padang lama Opis Menteri Pemansang Rama (KPS), Sri Aman ditu ensanus.

Ku iya, semua projek ti dikemansangka perintah BN nyadika kelai pengari rayat BN nadai kala naburka semaya puang.

“ Kami arapka  orang ti suah mantah pengawa ti dikereja pengari rayat BN muka mata sida sereta anang mantah peneka ati seraya naburka petenah enggau pemula.

Rohani ke mega Sapit Menteri Dagang Dalam Nengeri, Koperasi enggau Pekara Bebeli Barang Malaysia ngarapka rayat kelebih agi ba sitak Parlimen Batang Lupar terus nyukung perintah BN.

“ Sukung ari rayat ngagai perintah ke diatu beguna amat ngambika pemansang ulih dipajakka belama udah tu ila.

“ Enti rayat enda nyukung, kita nadai ngasaika pemansang ke nyadi ba menua kita. Nya alai maya PRU13 tu ila, kami deka nentuka rayat ngembuan sebuah perintah ke tegap sereta ulih mai pemansang enggau pengelantang ngagai sida,” ku iya.

Beserimbai enggau pengerami nya, Rohani diberi basa nyuaka perais Pekit Indu Bajik Parlimen Batang Lupar, Pekit Nyura, Pekit Nyumai, Pekit Ngubah Bunga, Pekit Futsal, Pekit Street Soccer, Pekit Eksesais enggau Pekit Karaoke.