Putarka dulu SVTB1M baru nyebut bantu bukai: Nyopis

0

KUCHING: Berita ti dipansutka Opis Pengintu Pengelantang Soldadu Veteran (JHEV) ti madah, Bantu 1Malaysia Ungkup Veteran Ke Ukai Pichin (SVTB1M) deka lanjarka ngagai raban balu sereta duda soldadu ukai berita ke ngenyitka ati sekeda orang.

Ku sida, amat manah bala balu enggau duda dipasukka dalam program nya dikena ngenang pengawa ti udah dikereja laki tauka bini sida ti berambunka nyawa ngetanka menua, tang pemutus ke baka patut diambi sepengudah bayar RM1,000 ti disemayaka sebedau tu dibayar dulu.

Seiku ari veteran nya, Paul Nyopis ari Bau ke udah nerima tanda pangkat  Pingat Gagah Berani (PGB) ketegal pemerani iya belaban enggau kominis kandang taun 1970 suba, madahka sida udah lama bendar nganti duit ti disemayaka nya dipasuk ke dalam akaun, tang nyentuk ke sehari tu lalu nadai nerima duit nya taja pan pekara nya udah dikemendarka.

“Perintah bedau mayar duit ke suba tang deka ngepun pekara ke baru. Putarka dulu pekara ke suba udah nya tau nyebut pekara ke baru,” ku iya.

Ku iya, perintah patut ngemeratka sida ke udah berambunka nyawa bejalaika pengawa nyaga pengelikun menua lebuh maya kominis kelia laban pemar ke ditapi maya nya mar amat, enti dibandingka enggau pengawa ti dipejalaika raban penyaga pengelikun menua sepengudah kominis nyerah diri suba.

“Berunding meh ke pengawa ti udah dikereja kami, lalu ba pekara ke baka tu kami patut dikemeratka dulu,” ku iya madah ngagai The Borneo Post apin lama ke udah.

Iya bejaku munyi tu lebuh ngenang penerang ke dipansutka JHEV ti madahka duit RM1,000 (sekali bayar) deka mungkur bala balu enggau duda soldadu veteran ke enda pinchin dikena ngingatka pengawa ti udah dipejalaika laki tauka bini sida ke nyaga pengelikun menua.

Ku Nyopis, pengawa ngenanka bayar duit bantu RM1,000 ari perintah nya semina deka ngeringatka sekeda orang ke lama udah nganti.

“Pekara tu ukai semina sentang duit nya aja tang mega pejalai polisi. Enti rayat udah pechayaka kita, kita patut ngenggam polisi sereta anang semina nemu besemaya aja. Enti kita udah besemaya, titihka meh jaku semaya nya.

“Baka kes kami tu, bayar keterubah udah dibayar ba Kuching kena 26 Januari, udah nya ku sida duit bala kami ke bukai deka dipasukka ngagai akaun kami dalam kandang dua minggu nangkanka nya, tang diatu udah dua bulan, kini tunga duit nya deh ?,” tanya iya.

Ku iya, enti duit nya lalu enda dibayar bala ex-soldadu enggau sida sebilik ba menua Bau enggau Lundu deka ngundi penyakal ba pengawa bepilih besai tu ila.

“Tu ukai jaku tundi, baka kami sebilik bisi urung 20 iku ke udah ngerejister diri ngundi lalu sida ngasika jaku aku, sapa ke patut diundi sida ila.

“Pekara tu ukai semina nyadi ba kami sebilik aja, tang bala pangan aku ke bukai pan deka ngereja pengawa  ke sama ngambika perintah nemu pengawa ke patut dipejalaika sida. Tu ukai ngenakut tang amat deka nyadi,” ku Nyopis.