Tuesday, November 12

Sarawak dikemegah ketegal tegap ba politik, mansang dalam ekonomi sereta likun

0

SRI AMAN: Sarawak udah ngayanka ngagai dunya luar, menua tu sebuah nengeri ke tegap ba politik sereta majak mansang ba ekonomi, ku Kaban Parlimen Sri Aman, Masir Kujat.

Ku iya, enti menua enda tegap, kitai enda ngasaika pengelikun sereta nyapai pemansang. Semua tu datai ari penyikar perintah Barisan Nasional (BN) mutarka menua Sarawak, ari baruh pegai Kepala Menteri Pehin Sri Abdul Taib Mahmud.

“ Kitai patut negapka politik lalu nyadika juluk nempa menua Sarawak lanatang serta likun,” ku iya bejaku ba pengerami Bejadika Hari Nyambut Pengawa Menua Sarawak ti udah 50 taun masuk gempung Malaysia Tikas Pelilih Menua Sri Aman ditu malam ensanus.

Ku iya, ketegal penegap politik pemansang, rayat pupu raban di menua tu seruran ngasaika pengidup ke likun sereta lantang, enda baka ba sekeda menua bukai.

“ Tu meh kelai rakyat diatu udah nemu pengawa bebasaka pangan diri, enda ngira bansa enggau jalai pengarap ulih negapka agi politik pemansang di menua tu.

Ku iya baru, beduduk ari penegap politik mega udah muka awak ngagai perintah BN meri mayuh macham projek pemansang belama ngagai serata menua tu.

“ Enti sema pekara ke nyadi bekaul enggau jalai pengarap,bansa enggau sekeda pekara ke bukai enda diputarka, pekara nya deka ngelemika semua program pemansang perintah ti mega lalu ngujungka kitai tinggal ari semua pekara pemansang.

“ Baka nya mega enti kitai suah disakal tauka semua projek pemansang ti deka dipejalaika perintah dipuntanka, menua kitai enda ulih maju baka sekeda menua bukai”, ku iya.

Ku iya baru, rayat enda patut ngembuan ulah ke suah deka nyakal perintah laban semua pemansang ti dipejalaika ba serata menua tu datai ari perintah BN.

“ Agi mayuh pemansang ke deka dipejalaika ba serata menua tu, nya alai rayat patut meri sukung ke penuh ngambika muntangka perintah ngemansangka menua tu “, ku iya.

Ku Masir, enti sema rayat meri peluang ngagai parti penyakal megai menua tu dudi ila, iya pechaya menua tu deka tasal ari pemansang.

“ Penyakal nadai juluk deka ngemansangka rayat, tang sida semina ngachau sereta mechahka rayat “, ku iya.

Sama bisi ngulu pengerami nya, Residen Bagi Menua Sri Aman, Jonathan Lugoh, Sapit Residen (Pemansang) Bagi Menua Sri Aman, Hamsein Attar, Sapit Residen (Pemansang Rama) Bagi menua Sri Aman, Felicia Tan Ya Hua, D.O Sri Aman, Ismawie Salleh, Kepala Polis Pelilih Mit Sri Aman, DSP Mat Jusoh Mohamad enggau Mohd Saperi Abdul Karim.

Berebak enggau nya, bisi diatur mayuh macham main endur mandangka main enggau adat asal raban bansa di Sri Aman, Deklamasi Sajak, mandangka gari, tikit benasit, beperindang enggau artis popular Iban sereta Live show jaku pesan Kepala Menteri Sarawak, Pehin Sri Abdul Taib Mahmud ti dipancharka terus TVi.