SRI AMAN: Kaban Parlimen Batang Lupar Datuk Rohani Abdul Karim madah perintah Barisan Nasional (BN) nadai kala ngemulaka rayat tang danji perinhah BN ngelamatu udah dikeamatka magang.
Ku iya, perintah BN bepegai ba prinsip deka ngemansang sereta ngintu nasit rayat tang ukai ngemulaka rayat.
“Kitai enggai diukmbai perintah seruran bejaku bula tang nama utai disemaya ke rayat ngelamatu semampai dikeamatka,” ku iya ba Astro Fiesta Mesra Belia Parlimen Batang Lupar ditu malam ensana.
Tandu iya semua projek ke dikemansangka perintah BN mandangka wakil rayat BN enda kala nabur danji puang tang semua danji ke disebut wakil rayat BN mayuh udah dikeamatka.
“Kitai arapka raban ke rindu bejaika pengawa wakil rayat BN muka mata sida lalu anang bejai enggau sepeneka ati sereta nabur petenah.
“Berunding meh enggau panjai lalu peda kediri empu semua projek enda ngira besai tauka mit, semua nya endang ari pengawa ke dikereja wakil rayat BN,” ku iya.
Rohani ke mega Sapit Menteri Dagang Dalam Nengeri, Koperasi enggau Pekara Bebelika Barang ngarapka rayat kelebih agi ba sitak Parlimen Batang Lupar neruska sukung sida ngagai perintah BN.
“Sukung rayat ngagai perintah kediatu endang dikearap ngambika perambu pemansang ulih dipejalai jemah ila.
“Enti nadai sukung rayat, kita enda ulih meda pemansang ke dipejalaika ba genturung menua kita.
“Berindik ari nya, kitai andal rayat dekaka sebuah perintah ke tegap ke tau mai pemansang, ngemajuka menua sereta meri penyenang ngagai rayat,” ku iya.