MIRI: Seiku lelaki diukum RM700 tauka jil tiga minggu olih Kot Majistret pagi kemari udah iya ngaku salah nyadi ijin bejalaika aktiviti judi empat lumur ekor enda belisin.
Ukum nya dilabuhka Majistret Lovely Natasha Charles udah nimbang sekeda pekara nyengkaum aku salah sereta pinta kasih ke dituduh, penerang kes sereta pemerat penyalah ke digaga.
Ting Swee Peng, 46, ari Lot 28 Lopeng ditu didawa nitihka Genteran 9 (1) Akta Rumah Judi Terbuka 1953.
Nitihka penyalah tu, orang ke dituduh tau dilempai ukum enda ngelui RM5,000 tauka ukum jil enda ngelui enam bulan, enti salah.
Bepelasarka tuduh kes, orang ke dituduh ditemu nyadi ijin bejalaika aktiviti loteri rama iya nya judi empat lumur ekor enda belisin.
Ke dituduh tu udah beruang bilik bisi anak tiga iku didawa ngereja penyalah tu pukul 3.40 lemai, 27 Februari 2011 di belakang Lot 981 Jalai Chong Poh, Krokop 6 ditu.
Ba mua kot, pemesai pendawa bisi mantai sekeda barang kes baka siti kalkulator, sebatang pen, selimpir keretas burak bisi ditulis empat angka sereta mata duit RM103 ngambika diterima nyadi kereban bukti.
Orang ke dituduh tu dalam pinta kasih iya minta ukum lempung agi beratika tu penyalah keterubah iya.
Inspektor Norliza Abdullah bedawa, seraya orang ke dituduh nadai diarika luya.