Raban indu ulih ngaga pemutus maya PRU13, ku Doris

0
BASA NGAGAI NUAN: Aaron (tiga kiba) nyuaka tepa ngagai Doris sepengudah bejadika ‘Program Muzarakah Isu Rama’ ba Rumah Leo Bakom, empai lama tu tadi.

BASA NGAGAI NUAN: Aaron (tiga kiba) nyuaka tepa ngagai Doris sepengudah bejadika ‘Program Muzarakah Isu Rama’ ba Rumah Leo Bakom, empai lama tu tadi.

KANOWIT: Raban indu bela mai reti ke besai ba pemutus Pengawa Bepilih Besai Ke-13 (PRU13) ti deka datai, pia ku penemu Sapit Yang Dipertua Dewan Negara, Senator Datuk Doris Sophia Brodie.

Tu ku iya, laban ari lebih semiliun bala pengundi nyauka setengah pengundi nya ari raban indu.

“Undi ari bala indu bela nentuka pemujur Barisan Nasional (BN) ba PRU13 tu.

“Mayuh bala indu kemaya hari tu udah ngerejister nyadi pengundi lalu kitai ngarapka sida anang salah pilih chalun,” ku iya.

Iya mantaika jaku nya maya bejadika ‘Program Muzarakah Isu Rama’ ke diatur Opis Pekara Khas (JASA) Sarawak ba Rumah Leo Bakom, Nanga Lipus ditu, empai lama tu tadi.

Maya program nya, peranak rumah panjai bela mendingka licha ari Direktor Pekara Pemansik Yayasan Tun Jugah Dr Robert Menua Salleh enggau Pemantu Sapit Presiden Maybank Berhad Dr Charlie Dudang.

Ku Doris nampung jaku iya, pengawa bala raban indu diatu mega dikemeratka perintah lalu nejuka mayuh bengkah program pemansang ungkup raban tu.

“Nya alai dikena kitai nimbal pementas perintah tu, sampal meh nyukung penuh ngagai Kaban Parlimen Kanowit Datuk Aaron Ago Dagang ba PRU13 tu,” ku iya madahka baru.

Iya ti mega Ketuai Raban Indu Parti Rayat Sarawak (PRS) ngelalau bala indu ngambika mengkang nyukung pegai BN.

“Kitai patut bisi ngembuan penemu ngambika enda sengapa diachuk penyakal tegal ti ngenggaika perintah BN.

“Kebuah pia laban ari penemu ti chukup kitai ulih meretika nama pemansang ke udah dibai BN kelebih agi ngagai Kanowit ditu,” ku iya.

Nambahka nya mega, Doris ngelalau bala indu bela sampal nurun maya PRU13 tu ila.

Ba pengerami nya, iya bisi nyuaka bantu RM5,000 ngagai Kaban Komiti Indu Rumah Leo dikena bejalaika pengawa tauka program sida.

Bela bisi nyempulang Doris iya nya Aaron, Sekreteri Politik Kepala Menteri Angeline Umis Tujok, pengari Pemesai JASA Sibu/Mukah Elisa Jaboh, Pemesai Opis Pemadah Kanowit Wan Mohd Zuki Wan Ismail enggau Penghulu Boniface Jacob.