Manifesto SWP ngemeratka peranak menua pesisir: Sng

6

NGARAP ULIH MENANG SEKEDA: Larry (tengah) bejaku nerangka 14 pekara dalam manifesto SWP kemari.

KUCHING: Sarawak Work­ers Party (SWP) kemari nge­munka manifesto pengawa bepilih parti nya ti ngundan 14 bengkah pekara.

Presiden Larry Sng ma­dahka 14 bengkah pekara nya ungkup pemaik rayat Sarawak lebih agi peranak menua ke diau di menua pesisir.

“SWP deka meratika mani­festo tu enggau berat lalu keran meri servis ngagai rayat Sarawak kelebih agi raban bansa asal ke nguan menua pesisir.

“Kitai angkun nentuka rayat menua tu diintu enggau manah dalam timpuh lima taun ti deka datai,” ku iya.

Iya mansutka jaku tu ba sebengkah aum pengarang berita nyerumba pengawa mantaika manifesto SWP ti diatur ba indu opis parti ditu, lemai kemari.

Entara sekeda pekara ke dibantai dalam manifesto SWP iya nya pelajar per­chuma ba palan pelajar tinggi ungkup ruang bilik ti nerima gaji kurang ari RM2,500 sebulan.

Ngaga jalai nyambung Sibu ngagai Kapit dalam timpuh lima taun ke deka datai.

Nyendiaka belanja RM100 juta dikena ngintu sereta ngelaku adat enggau main asal bansa asal.

Nyendiaka RM50 juta dikena ngaga enggau ngintu gerija sereta kuil.

Munaska penyeranta dalam timpuh lima taun.

Duit bantu pengelantang pendiau ditiki ngagai RM200 sebulan ungkup orang ke diau di menua pesisir ti semina ulih digusung nengah jalai ai.

Nyendiaka wang turu RM500 juta ungkup semua sekula bantu perintah di Sarawak.

Kelimpah ari nya, Larry mega madah tuju SWP di­tumbuh iya nya deka ngintu pengelantang pendiau rayat menua pesisir sereta mai pe­mansang ngagai sida lalu ukai ungkup seiku orang aja munyi ke tuduh sekeda orang.

Larry ke arapka SWP deka menang sekeda penuduk maya PRU13 madah 14 pekara nya deka diserangkum dalam manisfesto perintah ke megai kuasa sepengudah tembu pengawa bepilih besai ke13 (PRU13).

“Maya numbuhka perintah pengudah PRU13, kitai deka nentuka 14 pekara tu dipera­tika enggau berat.

“Kitai perchaya ulih me­nang ngalahka Parti Rakyat Sarawak (PRS) ba pengawa bepilih parlimen,” ku iya seraya madah, SWP udah ngerejister urung 35,000 iku kaban parti ke majak nambah ninting hari.