Wednesday, August 21

Tanya penuku ari indu opis PCM, ku Adit

0

ADIT

SIBU: Ex-Kaban Kunsil Nengeri (ADUN) Ngemah Gabriel Adit Demong madahka diri enda nemu sekalika bisi tauka enda Parti Cinta Malaysia (PCM) bisi nyabung chalun ba Pengawa Bepilih Besai Ke-13 di Sarawak.

Lebuh berandau enggau pengarang berita esanus, Adit madah, manah agi tanya nya ditujuka ngagai Indu Opis PCM.

“Aku ukai madah PCM nadai enggau bepilih di Sarawak, kita tau ngenukuka pekara tu enggau sida ba Indu Opis din,” ku iya.

Lebuh ditanya baru sentang pekara nya, Adit semina beentelah.

Maya pengerami nyambut Malam Gawai Parti Pekerja Sarawak (SWP) ba Palan Pameran enggau Dagang Sibu ditu taun nyin kemari, Adit bisi dipeda ngulu pengerami nya.

Penatai iya mantaika mayuh macham tanya bekaul enggau kuing politik iya.

Ba pengerami nya, Adit dipeda betabi enggau semua kaban Kunsil Besai parti nya sereta berandau lama enggau Presiden SWP Larry Sng.

Enda baka be pengawa bepililih menua ke udah, PCM sekali tu nadai engkeretik taja pan PRU-13 deka diatur enda lama agi.

Ba pengawa bepilih menua 2011, PCM betanding di Simunjan, Balai Ringin, Ngemah, Machan, Kakus enggau Bekenu.

Kena tengah bulan Mac tahun tu, ex-chalun sitak Bekenu ti ngarika PCM, Datuk Pengiran Juliana Pengiran Tambi udah ningkilka diri ari parti nya.