Enti parti ngatika diri enggau penyakal menang, nya deka ngemuntanka projek pemansang ke udah diperambu: Masir
SRI AMAN: Penyandang Parlimen Sri Aman Masir Kujat madah rayat aruh enda nerima penatai parti ngatika diri (Bibas) enggau penyakal ngagai sitak Sri Aman ke nguji ngulihka sukung politik ari sida rambau pengawa bepilih besai ke-13 (PRU13) tu ila.
Ku iya, enti sema penyakal enggau Bibas menang ba Parlimen Sri Aman nya deka ngemuntanka pejalai projek pemansang ke beungkus lebih RM400 juta.
“Parlimen Sri Aman diatu benung ‘disum’ enggau projek pemansang ari perintah Barisan Nasional (BN) baka ngaga sepital baru, ngemanahka palan napis ai enggau Bekal Elekterik Menua Pesisir.
“Enti sema BN alah ba Parlimen Sri Aman, proses pemansang ditu deka puntan, nya alai, aku ngarapka rayat ulih berunding panjai ngasaika pemansang ke deka datai enti terus nyukung tauka milih BN rambau PRU-13 ila,” ku iya.
Iya madah munyi nya ba maya bejadika pengerami begulai enggau rayat ke diatur ba Rumah Bali anak Bandan, Kampung Giam Lama, Simunjan, bedau lama tu tadi.
Tandu iya, rayat mega aruh berasai takut enti sema penyakal ulih menang ba Sri Aman ila.
“Peneleba perintah BN ngemajuka nengeri tu aruh dipeda enggau terang kena mandingka pengawa ke digaga parti penyakal ba atur pemansang pengidup sida ila ba menua tu,” ku iya.