BINTULU: Chalun Parti Tindakan Demokratik (DAP) dilalau ngambika enda mantaika isu tauka pekara ti enda amat dikena ngulihka sukung ari pengundi rambau kimpin Pengawa Bepilih Besai Ke-13 (PRU-13) sepengelama 15 ari tu laban nya semina tau nyarut sereta ngasuh runding rayat charut aja, ku Dato Sri Tiong King Sing.
Ku iya, chunto ti engkeman iya nya penyarut tanah ti nyadi ba Rumah Emperan Sungai Serakit Sebauh alai bala penyakal kelebih agi DAP ngena isu tu dikena nyalahka Barisan Nasional (BN) madahka BN ngambi tanah rayat.
“Tang kebendar iya, penyarut tanah ba Rh Emperan tu endang nadai kaul enggau BN laban nya semina penyarut entara sida serumah enggau orang ari rumah bukai ba pelilih menua Serakit,” ku iya ba aum pemberita ti diatur lemai Hari Minggu tu tadi.
Beduduk ari nya, Tiong, ngelalau DAP ngambika enda beambi ulih ari penyarut tanah tu dikena ngapika pemenchi rayat ngagai BN laban utai ti nyadi bakatu kadang-kadang enda baka ke diperagam ati mensia.
Ku Tiong, tampak endar tuai rumah tu tadi nyadika engkeramba DAP dikena ngapi pemenchi rayat ngagai BN ti endang udah mayuh nulung mutarka penanggul bekaul enggau tanah rayat.
“Nadai raban penyakal kelebih agi DAP beratika semua pemanah BN dalam mutarka penanggul tanah ba tiap bengkah bagi menua di Sarawak tu kelimpah ti ngapi sereta mansutka penemu ngasut runding ti ngujungka penusah tu mar agi diputarka,” ku Tiong.
Tandu iya, enti DAP bebendar deka nulung rayat, manah agi sida nerangka utai ti amat nyadi tang ukai ngiga penyalah BN.
Ba aum pemberita nya, Tiong mega ngelalau chalun DAP Dr Anthony Brian ngambika ngelalau penyukung iya enda mantaika isu ti enda amat enggaika utai ti bakanya tau mangkung pala sida empu.
Ku iya, manah agi raban DAP nerang ngagai rayat nama kebuah lambang DAP ulih dikena rambau PRU-13 tu sereta anang nyadika isu dikena nagih undi madahka Opis Pengerejister Gerempung (RoS) enda ngasuh parti nya ngena lambang DAP maya bekimpin ambika enda pulaika penyarut runding rayat.