Saturday, September 19

Baram deka ngasaika mayuh pemansang enggau program transformasyen

0

MARUDI: Rayat di menua Baram deka ngasaika mayuh pemansang enggau program transformasyen dipejalaika perintah Barisan Nasional (BN) jemah ila, bepelasarka manifesto BN.

Chalun BN ba sitak nya, Anyi Ngau madah iya deka nampung baru semua program ke udah dilanggur ungkup komuniti ba sitak nya lalu besemaya bejalaika mayuh macham program pemansang enti iya diberi mandat pengudah Pengawa Bepilih Besai 13 (PRU13).

“BN nengah Datuk Seri Najib Razak udah mantaika manifesto, bepelasarka penemu aku, manifesto nya siti ari program transformasyen.

“Nya alai, maya kitai bejaku bekaul enggau transformasyen, nya mai reti kami deka bebendar agi gawa,” ku iya maya dikerandau pemberita bedau lama ke udah.

Ku iya, enti bisi orang ngasuh kitai bebendar agi gawa, kitai sigi enda nemu ngetu gawa.

“Kitai aruh bebendar agi gawa, besaup enggau pangan diri ngambika bulih pemujur. Semua program enggau perambu ari BN ungkup raban bansa patut digaga ngambika pulai ke penyenang ba pengidup peranak di tetiap sitak menua,” ku Anyi.

Anyi ngelalau rayat nyukung lalu ngundi sereta ingatka pengawa ke udah dikereja perintah BN ngelamatu.

“Kitai semua deka meda pemansang dipejalaika ba menua Baram ila, nya alai, kitai aruh nyukung Menteri Besai,” ku iya.

Anyi deka betapi entara tiga sukut ngelaban pengari Parti Keadilan Rakyat (PKR) Roland Engan enggau chalun Ngatika Diri Patrick Sibat Sujang.