MANDANGKA SUKUNG: Sebagi ari penyukung Mawan ke mendingka penemu maya atur pengawa bekimpin ba balai Raban Bansa Saratok ditu, ensanus.
KUCHING: Chalun BN-SPDP ba sitak parlimen Saratok, Tan Sri William Mawan Ikom udah nyikap diri napi perang ke diapika pengeringat.
Enti pengawa matak baru kaban parti ke ringat sereta nyukung penyakal nya mujur dipejalaika Mawan, iya enggau menijer pengawa kimpin iya sereta semua raban pengawa bepilih BN bisi peluang teulihka pemujur taja pan menang mipis.
Raban Mawan ukai semina betapi enggau penyukung kuat PKR ke majak mayuh kelebih agi raban bansa Iban di Krian, tang bisi mega sekeda orang ke ngalihka diri sereta nguji ngasaka ati Mawan nyerumba hari muai undi kena 5 May tu ila.
Bisi sekeda raban tu madahka diri mengkang enda lantang ati laban orang ke dipilih sida, penyandang sitak Saratok, Jelaing Mersat enda dipilih BN nyadi chalun ngetanka sitak Saratok ba PRU13 tu.
Lebuh ke enggau betemu kena malam Hari Dua tu tadi, Mawan ke dipeda baka ke nadai pengirau ati taja pia iya berasai sinu laban orang ke dipilih iya nyadi ketuai suba, diatu ngembuan penatai pemisi sereta jalai pengidup ke manah sereta penyukung ke enda angkun ke Jelaing enda agi mandangka penaluk ngagai iya.
Ku Mawan, enti BN milih Jelaing tauka sesapa ke taluk ke Jelaing nyadi chalun ba sitak Saratok Mawan tetap bekimpin ke sida, tang lebuh iya dipilih semua sida ngenyauhka diri sereta mandangka pengeringat ngagai iya.
Ukai semina nya aja, sida nya diatu mega ngarika raban penyakal ke dilaban sida maya ke agi enggau BN suba.
Mawan ke endang orang BN sereta menteri kanan enda ulih nyeliahka diri ari bejakuka perambu BN ke deka ngemansangka menua Saratok enggau semua sitak nya.
Ku Mawan: “Baka ke ditemu kita, Menteri Besai Datuk Seri Najib Tun Razak nengah BN endang bebendar deka ngemansangka menua Malaysia ngambika ulih nyapai juluk 2020, iya (Najib) udah nengkebang program Transfomasyen Perintah enggau program Transformasyen Ekonomi. Ba runding aku, Menteri Besai enda lantang ati meda orang ke enggau BN enda tetagangka pengeringat tauka ninggalka kaban diri.”
Apin lama ke udah,Najib ngelalau bala ketuai BN semina tau ringat dalam kandang 24 aja enti sema sida enda dipilih BN, tang udah nya suman baru sepengudah pengawa ngantung nama sereta mandangka pengangkun ngagai BN.
Ku Mawan bisi orang ringat dalam timpuh ke pandak , udah nya begulai baru enggau BN, tang bisi mega orang ke mejak ringat.
“Taja pan aku nemu sida mengkang ngaitka diri enggau BN sereta betemu lalu ngulihka pengasih ari rayat tauka nyukung PKR, tang aku agi meri sida peluang ti kedua kali mulaika diri. Enti sida mulaika diri, aku deka ngintu sereta bebasaka sida laban sida udah gawaka BN ngelama tu,” ku iya.
Mawan ke mega Menteri Pemansang Rama madahka, “Kenyau aku masuk ba pengawa politik, aku endang seruran begulai enggau rayat,baka nya mega ba sitak Saratok. Aku endang seruran enggau kita, lalu aku bisi ditu ungkup kita.”
Mayuh mega orang ulih nampai jauh, Mawan deka ngemujurka juluk ati sdia mali menua Saratok nyadi manah agi ari segi pemansang perengkaguna, pelajar sekula, ekonomi sereta pengawa ba Lumba enggau Main.
Mawan mega seruran deka ngemujurka pelin pemansang ke besai ungkup menua Saratok enggau program ‘Prosper Thy Neighbour’ ke ukai semina deka nguntungka menua Saratok aja, tang mega kandang menua ke besemak enggau nya.
Kena pagi enggau lemai Hari Dua, Mawan udah bekimpin ba Rh Ragai Tembedak Gelang di Pelasu Roban ke digulu 13 iku tuia rumah enggau bala Komiti Pemansang enggau Genturung Pendiau (JKKK) sida, ngagai Rh Langan Ulu Sebetan Krian nerangka kebuah BN milih iya tang ukai sekeda chalun ke bukai nyengkaum Jelaing.
Kena Hari Tiga, Mawan nerima penemuai urung 300 iku nyengkaum Pemancha, Pengulu, Tuai Rumah, raban JKKK enggau bala konsilor ba Dewan Kominiti Saratok lalu nerangka ngagai sida kebuah chalun BN ba sitak Saratok patut disilih.
Berebak enggau nya, sekeda orang ke enda lantang atika Mawan udah ngerusak poster besai gambar Mawan.
Ba pasar Saratok,orang ke bekimpuin ke Mawan ngelaban chalun PKR Ali Biju, udah nirika sebuah billboard ke digaga ari besi ngambika enda mudah dirusak agi.
Ali ke nyadi Kaban Kunsil Nengeri Krian pengudah iya ngalahka Sapit presiden SPDP, Datuk Peter Nyarok Entrie ba pengawa bepilih menua 2011 enggau majoriti undi ke besai.