Thursday, September 19

Masing: BN ngangkatka tikas pengidup rayat Lubok Antu

0

ENGKILILI: Parlimen Lubok Antu endang ungkup Parti Rakyat Sarawak (PRS) – Barisan Nasional (BN) ti deka ngangkatka tikas pengidup rayat jemah ila nengah pemansang, pengudah Pengawa Bepilih Besai Ke-13 (PRU13) tu.

Presiden PRS Tan Sri James Masing madahka, kebuah pia laban BN ulih ngenyungkakka pengidup rayat di Parlimen Lubok Antu ngagai tikas ke manah agi dalam lima taun ti deka datai.

Nitihku iya, kandang menua Lubok Antu udah ngasaika mayuh ubah ari segi pemansang nengah BN ti diarika Kaban Parlimen William Nyalau Badak ke nyadi chalun BN ba PRU 13 di sitak nya.

“Mayuh udah projek dikemansangka perintah BN ditu baka projek jalai alun, elekterik enggau bekal ai beresi enggau kebukai.

“Berindik ari nya, aku minta semua rayat di sitak Parlimen Lubok Antu meri sukung ngagai BN, ngundi chalun kitai William Nyalau Badak maya PRU 13,” ku iya.

Iya bejaku ba pengerami tuai begulai enggau rayat ke diatur ba Rumah Sumping, Skim Skrang, Engkilili ditu.

Masing ke nyadi Menteri Pemansang Tanah minta rayat di kandang menua Lubok Antu enda nyukung penyakal ke nguji deka ngerampas sitak nya ari BN maya PRU 13.

“Nama kebuah kitai deka milih chalun orang luar nyadi pengiring ditu?.

“Tambah mega kitai udah bisi chalun peranak Lubok Antu nyadi pengari rayat BN.

“Sukung meh Nyalau laban iya amat nemu pasal pengidup rayat di kandang menua ke dipegai Parlimen tu,” ku iya.

Bisi datai ba pengerami nya Sapit Speaker Dewan Negara Senator Datuk Dorris Sophia Brodie, Kaban Kunsil Nengeri (ADUN) Engkilili Dr Johnnical Rayong Ngipa enggau chalun BN Parlimen Lubok Antu William Nyalau Badak.