Tuesday, September 17
September 16

‘Penyakit mata’ penyakal patut ‘diperubat’

0

KUCHING: Dato Sri Douglas Uggah Embas, chalun Barisan Nasional (BN) Parlimen Betong meri kelala ngagai raban penyakal madah benung kena ‘penyakit mata’ laban ti enda meda nama pemansang ke udah digaga perintah BN ngagai rayat.

Iya madah mata chalun penyakal ari Parti Keadilan Rakyat (PKR) Cecilia Siti Una aruh “diperubat” laban iya bebula madah menua Betong agi ba baruh atur pemansang sereta bisi penanggul ba isu tanah.

Uggah madah “iya enggau lantang ati mantu chalun penyakal nya ngiga pakar mata ke pengabis landik ngambika ulih merubat penyakit mata nya”.

Bejaku ngagai pemberita kemari, iya madah perintah BN nadai kala ngelaungka atur pemansang ba menua Betong ari perambu pemansang menua Malaysia.

“Aku enda nemu nama reti jaku iya madahka Betong bisi napi penanggul isu tanah enggau agi ba baruh atur pemansang. BN udah bebendar ngemansangka Betong lalu diatu benung ngerembai mansang,” ku iya

Minggu nyin kemari Cecilia bisi nemuai ngagai menua di pelilih Spaoh enggau Debak, nyerumba enggau nya iya ningaka sebana ke ditapi rayat menua nya.

“Rayat ambika chunto baka ba Kampung Tuie nadai disikap enggau sistem bekal ai beresi lalu sida semina bepanggai ba ai ujan maya napi musin kemarau,” ku iya bedau lama ke udah.

Iya mega madah rayat ba genturung pendiau menua nya bedau diberi surat pala tanah ke dipadahka iya diau kampar ba tanah diri empu.

Uggah nimbal iya deka betemu enggau semua rayat Betong kena mutarka penanggul ke ditapi sida sereta nerangka perambu pemansang enti sema dipilih baru nyadi pengari ke sitak parlimen Betong jemah.

Kededua chalun diatu benung kiruh bekimpin betemu enggau pengundi ba pelilih menua Parlimen Betong.

Uggah enggau Cecilia tengali alan ba Betong.