BINTANGOR: Urung beratus iku nyengkaum bala peranak Rumah Peter Minggat, Sungai Mupong ditu berasai asa ati ketegal chalun Barisan Nasional (BN) Datuk Norah Abdul Rahman enda nyadi datai nemuai ngagai rumah panjai sida, kena Hari Lima tu tadi.
Tuai Rumah Peter maya dikerandau pengarang berita madahka pekara tu ukai salah Norah tang bepun ari seiku kaunsilor menua nya sebedau tu ngasuh sida serumah besedia nyambut penatai Norah nemuai ngagai rumah panjai sida sehari nya.
“Kitai enda nyalahka iya (Norah) tang tu nyangka salah tampung kaunsilor nya.
“Tang taja pia kami serumah berasai enda lantang ati ketegal udah masau jam kelimpah rugi belanja laban udah ngerintai semua program tang pengerami tu enda nyadi,” ku iya.
Tandu iya, bala mayuh ari rumah panjai bukai mega bisi datai ngagai rumah panjai iya tang pulai lebu sepengudah nemu Norah enda nyadi datai.
“Ukai semina nya, bala kami serumah kebukai ke endang gawa bekuli ba mengeri nyau muai jam sida gawa ketegal pekara tu.
“Semua kami andal amat nganti penatai Norah,” ku iya madahka baru.
Peter madahka minggu sebedau nya iya bisi dipadahka seiku kaunsilor senentang program penemuai Norah ngagai rumah panjai sida.
Tang udah semua disikap nyengkaum nesau bala bukai, iya dipadahka Norah enda nyadi datai.
“Taja pia kami ngelengka pekara tu lalu mengkang ngarapka Norah ulih datai nemuai ngagai rumah panjai kami udah tu ila,” ku iya.
Sida serumah enggau bala ba menua Mupong kebukai ku Peter, kenyau ari suba enda kala ngalih undi ari BN.
Kebuah pia ku iya, laban peranak menua nya mengkang begunaka pemansang kelimpah beterima kasih ngagai perintah BN laban taja mimit tang bisi kena tempias ari pemansang Projek Kuasa Tau Dikena Baru Sarawak (SCORE).
“Kami ditu besai amat pengarap ulih dilawa projek jalai alun matik ari Jalai Sibu-Tanjung Manis ke dipelabaka semina empat kilometer aja penyauh ari menua kami.
“Semua juluk ati tu ba runding kami ditu semina ulih dipenyadika perintah BN aja,” ku iya.
Parlimen Tanjung Manis deka diperebutka chalun BN Datuk Norah Abdul Rahman enggau chalun PAS Jurina Mut.