Perintah ngemansangka NCR ke penguntung rayat: Jabu

1

LUNDU: Perintah deka ngemansangka tanah asal adat Bumiputera (NCR) ngambika ulih meri penguntung ngagai orang ke beempu tanah.

Sapit Kepala Menteri Datuk Patinggi Tan Sri Alfred Jabu madah atur baka tu ngayanka Perintah ngamatka semaya deka mantu orang ke beempu tanah ngambika ulih meri penguntung nyentuk ke anak uchu sida.

“Tanah NCR pesereta ulih disangkung nyentuk ke anak, uchu, ichit sida iya enti dikemansangka. Nya alai jaga tanah NCR kita enggau memanah,” ku iya.

Ku Jabu, di sitak Bau-Lundu, bisi 19 buah ladang ti mungkur urung 150,000 ikar tanah sida udah dikemansangka Komiti Penyerakup enggau Pengintu Tanah Sarawak (SALCRA) lalu di Sarawak bisi 22 pesereta masuk dalam sekim SALCRA.

“Penyampau tu deka nambah berindik ari peminta ba sitak Balingian, Selangau, Baram, sereta luar ari 19 buah ladang ke benung di pejalaika diatu.

“Peminta sigi mayuh laban SALCRA udah bejalaika pengawa enggau manah, tambah mega SALCRA udah kami meri dividen ke manah ngagai raban pesereta,”ku iya.

Tandu iya, nitihka ‘Ordinan Constitution SALCRA’ tetiap tanah ke deka dikemansangka patut disukat lalu diberi surat pala tanah pechuma.

“Perintah enda minta sesin ari raban pesereta lalu deka diberi surat pala tanah nitihka Seksyen 18 ulih perintah nengah Opis Tanah enggau Survei (JTS)” ku Jabu.

Ba atur pengawa nya kemari, Jabu nyuaka surat pala tanah NCR ba baruh SALCRA ngagai 919 penerima lalu ditangkan deka disua ngagai 1,014  penerima di Saratok.

Tu mandangka perintah ngamatka semaya, lalu timpuh nya datai ngagai anak, uchu enggau ichit, nya alai, tanah NCR patut dijaga enggau memanah, ku iya.

“Aku chukup beterima kasih ngagai komuniti Bidayuh taja pan SALCRA laun ngemansangka sitak ditu, nyengkaum di Serian, tuai pemesai Bidayuh nyengkaum Gerempung Dayak Bidayuh National (DBNA) laban udah nyaup SALCRA ngatur tanah NCR.

“Tanah kita enda lenyau, enda kena ambi…Anang irau tang perintah nengah SALCRA deka mantu kita ngemansangka tanah NCR ngambika meri penguntung ngagai kita,” ku iya.

Ku iya, bepun ari SALCRA ditumbuhka, urung RM601 juta udah dibayar ngagai pesereta..

“Taja rega sawit bisi nurun mimit taun nyin tadi, SALCRA agi ulih mayar lebih RM101 juta dividen ngagai raban pesereta, tu Danji Dikeamatka,” ku iya.

Sama bisi nyempulang Jabu, Menteri Pemansang Infrastruktur Dato Sri Michael Manyin Jawong, ADUN Opar Ranum Mina, ADUN Kedup Martin Ben, chalun PRU 13 sitak Mas Gading Anthony Nogeh, Menijar Besai SALCRA Datu Vasco Sabat Singkang, Datu Jaul Samion, Sekretari Mendam Opis Menteri Pemansang Betanam Betupi Moden Datu Dr Ngenang Janggu, Sekretari Mendam Pemansang Menua Pesisir Datuk Chaiti Bolhassan enggau Sekretari Mendam Opis Menteri Pengawa Dagang Temuai Datu Ik Pahon Joyik enggau Temenggung Austin Dimin.