DIPENYADI: Oliver (kiba) ngetas riben kelai bejadika Album Gawai 2013 Band Kimara di Borneo Ethnic Cafe ditu. Bela dipeda Jerry Kamit (empat ari kanan).
KUCHING: Album Gawai 2013 Band Kimara ke dikeluar Seahorse Music Centre (SMC) Miri mujur dipenyadi malam Hari Enam nyin kemari di Borneo Ethnic Cafe.
Album Gawai 2013 ngundan sepuluh buah lagu iya nya Melah Pinang Nyerumba Hari Gawai, Buka Pelepa Tambai Gawai, Selamat Hari Gawai, Nyambut Bala Pengabang, Gawai Nuju Penyenang, Rami Gawai Dayak, Pesan Hari Gawai, Selamat Nyambut Gawai, Joget Rami Gawai enggau Belala Rami Gawai.
Album nya dipenyadika Manager OCH Sound Oliver Christie Henry.
Album tu ngundan lagu-lagu ke ngenataika mayuh macham tiun ari Band Kimara, Jerry Kamit, Wilbert Kamit, Grace Prinsiana, Apin & Project 2 enggau Diddy.
Entara komposer ke mantu ngemujurka album tu iya nya Ganing Assan kelimpah ari bantu Ricky Jay.
Kelimpah diperindang Band Kimara, raban temuai ke datai mega beperindang begulai enggau penanyi sereta pemain sape tebilang Jerry Kamit enggau Diana Belikau.
Album Gawai 2013 Band Kimara berengkah dijual seminggu ke udah.
BEPERINDANG: Diana Belikau di atas panggau Borneo Ethnic Cafe merindang temuai ngena lagu iya seraya diiring Band Kimara.