KUCHING: Opis Muzium Sarawak taun 2013 nagit ambis nadai 1.2 juta temuai datai ngagai muzium di serata Sarawak.
Direktor Opis Muzium Sarawak, Ipoi Datan madah, opis iya deka chakah agi ngatur mayuh program dikena narit temuai datai ngagai muzium.
Nya berindik ari taun nyin kemari (2012) bisi kusut enti dibandingka ba taun tiga taun ke udah (2011) ke bisi 1.5 juta temuai datai ngagai muzium di serata Sarawak, ku iya.
“Pemayuh temuai ke datai ngagai muzium di Sarawak tiap hari amat manah. Pukul rata pemayuh orang ke datai iya nya 1 juta iku setaun.
“Antara program dikena narit mayuh temuai nemuai ke muzium, ba bulan Ogos ke deka datai kitai enggau kerejasama Petro Science deka mai dinasour ke Kuching ditu,” ku Ipoi lebuh dikerandau pengarang berita kemari.
Dulu ari nya Ipoi nyempulang Ketuai Direktor Opis Muzium Malaysia Datuk Ibrahim Ismail ba aum pengarang berita nyerumba Hari Muzium Antarabangsa Peringkat Kebangsaan 2013 ke diatur ba Dewan Tun Abdul Razak ditu, kemari.
Antara muzium ke bisi di Sarawak iya nya Sarawak Museum (Old Building); Sarawak Museum (Dewan Tun abdul Razak); Islamic Heritage Museum; Chinese History Museum; Niah Archaeology Museum; Limbang Regional Museum; Baram Regional Museum; Textile Museum; Petroleum Museum; art Museum; Sarawak Women Museum; Fort Margherita enggau Natural History Museum.
Berebak enggau nya Ibrahim lebuh dikerandau madahka ngemeran konsep pelajar enggau merindang ke ulih dipasuk semua pupu raban bansa.
Iya muji opis mizium Sarawak ke ngatur mayuh bengkah pengerami sereta pengawa pemandang ke ulih narit temuai datai.
“Sarawak amat chakah ngatur program ti ukai semina pengawa pemandang tang nyengkaum licha, forum enggau kebukai.
Berebak enggau nya lebih 3.2 juta iku penyampau temuai ke datai ngagai 20 bengkah muzium dibaruh kuasa iya taun nyin kemari, lalu nya ngelui ari juluk tikas penyulut (KPI) 3.2 juta iku.
“Taun tu (2013) kami nagit 3.3 juta iku temuai datai ngagai 20 bengkah muzium ti dipegai aku,” ku Ibrahim.