Pelajar Jaku Iban di sekula enda pupus, ku Jabu

0

KUCHING: Sapit Kepala Menteri Datuk Patinggi Tan Sri Alfred Jabu berat-rat madah pelajar Jaku Iban enda deka pupus.

Iya nyebut pekara tu lebuh bejaku ba Pengerami Makai Lemai Mantar Gawai kena malam Hari Enam tu tadi ke alai iya madah, jaku Iban udah diajar ngagai 72,000 iku nembiak sekula ba sekula pirimari enggau sekondari dikena ngenukuka jaku nya enda lenyau.

Nambahka nya ku iya dia­tu udah bisi bup ke dichelak ungkup belajar sereta ngajar jaku nya , seraya nya mega matapelajar tu diambi di tikas diploma ungkup pen­gajar ke benung belatih ba Universiti Perguruan Sultan Idris di Perak enggau Insis­tut Pengajar di Bintangor.

“Jaku Iban enda pupus. Iya deka mengkang belama berindik ari pemayuh nem­biak bansa Iban ke belajarka jaku nya di sekula primari enggau sekondari,” ku iya bejaku ba Pengerami Makai Lemai Mantar Gawai ke dia­tur ketuai raban bansa Iban di pelilih Kuching.

Iya mega nebah Dayak Cultural Foundation (DCF) deka ngatur simposium Iban di Sibu dalam beberapa bulan ke deka datai dikena ngerandang jalai pemansang ngagai raban bansa tu.

DCF, udah nyelak sekeda bup lalu deka neruska pen­gawa nya ngambika nge­mansangka Jaku Iban.

Ba kaul ke bukai ku iya indu opis DCF, Kunsil Adat Istiadat enggau kot Peranak Asal deka ditumbuh di Kota Samarahan.

Berebak enggau nya mega iya ngungkupka MRP RM20,000 ngagai ketuai raban bansa Iban ngatur pengerami Makai Lemai Gawai taun siti nyin ila ke alai iya madahka tu beguna bendar dikena ngelumu raban bansa Iban ke udah mendam diau di mengeri Kuching.