ZK BAND Tetarit Ati Enggau Pemansang Industri

0

MUZIK nya ‘medium’ ke pemadu engkeman dikena ngedut kaul entara menua enggau mensia di dunya tu. Iya nadai sekat enggau adan, enda bechiping lalu ngerenchah menua enggau nadai mayuh penti pemali. Tegal nya, kitai bisi rambai jaku “unity through songs” tauka serakup nengah lagu; siti fakta ke enda ulih disakal laban muzik endang amat ulih nyerakupka semua mensia enggau enda ngira menua, bansa tauka ugama ti dipegai sida.

Di Malaysia, muzik ngerembai enggau chara lantang. Muzik etnik ti ngayanka identiti siti-siti raban bansa mega disambut manah ulih raban etnik ke bukai. Muzik ngemudahka kitai bekelala sereta bebasaka pangan diri. Reti nya, semua anak seni tau mantaika asil seni diri enggau nadai sekat laban iya sama tau merindang diri enggau orang bukai ke ninga.

 

ZK Band

 

Bala pemacha ti dipebasa, artis Pemerindang kitai ke minggu tu iya nya ZK Band. ZK Band ditumbuhka dalam taun 1998 suba ulih tiga iku diri menyadi ke chukup tebilang di Limbang. ZK Band betuaika Zaidie Kawang (gitar), Hillary Kawang @ Boy (bass), Glen Kawang @ Glen (drum) enggau Steven Naga @ Unan (vokalis).

“Iya ti bendar, vokalis asal kami ukai Unan laban iya (Unan) semina nganti vokalis asal kami ke udah narit diri. Taja pan pia, kami chukup betuah laban Unan ulih meri komitmen ke pemadu manah lalu ulih mega bekerejasama enggau kami tiga menyadi”, ku Zaidie Kawang ke lalu madahka sida tiga menyadi ukai Iban tang penakan Bisaya – Bidayuh.

Taja lama udah bisi nama, ZK Band bedau bisi peluang endur nyadi rekoding artis. “Sementara nganti peluang nya, kami sebuat ngelama tu ngiga peneleba bemain ba kelab malam, fun fair enggau mayuh macham pengerami seraya dikena kami belatih belagu enggau bemain muzik. Kelimpah ari di menua Limbang, kami mega kala dikangauka orang bemain di Miri” ku Zaidie Kawang sambil madahka juluk ati sida ti deka ngaga album endang ari suba-suba tang semina diperam pia aja laban peluang nya lalu enda datai-datai.

 

Baka Ni Bulih Nama ZK Band?

 

Nama ZK Band diambi ari nama ketuai band, Zaidie Kawang ke bemain lead gitar. Nama nya ku iya nyamai agi dikeingat sambil dikena sida sebuat ngingatka nama sida tiga iku diri menyadi.

“Terima kasih ngagai Petara laban nama ZK Band tu mai pemujur ngagai kami sebuat. Taja pan ngena pun urup nama aku tang ukai ga reti aku semina deka mantaika ‘glamour’ aku empu aja. Ba kami sebuat, ‘glamour’ tau nadai reti enti kuchik kitai semampai puang. Nyadi artis beraban, kitai mesti ngembuan ati ti lurus, bisi pengeran deka bepekit ngena ‘produk’ (asil seni) diri ke tulin. Produk nya lagu enggau muzik kitai”, ku Zaidie Kawang sambil madahka ati dengki mega enda patut dikembuan orang ti deka mujur.

Kelimpah ari nya, Zaidi mega madahka siti ari gaya orang ti maju iya nya sida enda kelalu jampat tepantup ati enggau utai ti digaga diri. Kebuah pia ku iya, kelalu jampat tepantup ati sebaka mega enggau kitai ke badu ngaga utai ke baru tang semina ngetanka utai ti lama. Enti senario ke bansa nya amat nyadi, dia artis nya deka ditinggalka peminat sida laban peminat diatu semampai deka meda sereta ninga muzik enggau lagu ke baru.

 

Genre Muzik

 

ZK Band rinduka muzik rock balada. Kebuah pia ku sida laban muzik nya engkeman amat enggau sada nyawa vokalis sida, Unan. Album Tinggal Pengingat ngundan 10 iti lagu lalu sekeda ari lagu nya iya nya Semina Nuan Siku, Rock n Roll Din Ditu, Jelungan, Ampun Meh Aku Ambai, Pulai Belelang, Nuan Beduan Aku, Dengki Sama Mensia, Endu Penipu, Kin Kitu, Nga No Kenangan enggau Hanya Kenangan. (bonus track).

Ditanya baka ni prinsip sida ba muzik, Zaidie Kawang madah, “ZK Band pechayaka pengulih enggau daya nengkebang muzik enggau lagu kediri empu. Semua muzik kami endang tulin tauka “original” lalu digaga nitihka pengasai ati kami empu. Ba kami, iyar meh kami dikelala enggau muzik kami ti tulin”.

 

Benasit Betemu Enggau Boss PBP – Embat Lala

 

“ZK Band ti bendar udah kala ngerikut lagu begulai enggau Syarikat LUH di Sibu dalam taun 2009 suba. Tang laban ukai nasit panjai begulai, album kami nya enda tentu laku. Lalu dalam taun 2012 tu tadi, kami chukup benasit laban seiku pangan kami ke gawa ba Panggau Buluh Pengerindu (PBP), Mr Fadily @ Kunne bisi rekomen kami ngagai menijar besai PBP, Pengajar Embat Lala. Seninjik endar ga Pengajar Embat tetarit ati pengudah iya mendingka lagu kami sebuat”, ku Zaidie Kawang ngenang singkang keterubah sida sebedau nyadi artis PBP.

Bepun ari ati ti chukup beterima kasih ngagai PBP, Zaidie Kawang agi ingat amat ke jaku Pengajar Embat Lala maya ke baru nerima sida (ZK Band) nyadi artis PBP ke munyi tu, “Enda kempang aku enda nerima sida sebuat tu nyadi artis PBP laban ba penemu aku sida tu cukup bepeneleba ba bidang muzik. Sayau ga enti bakat sida iya enda dikemansangka ngena jalai ke betul. Nya alai, ba aku empu, enda malu aku ngumbai ZK Band tu ‘OTAI’ (artis lama) ba dunya pemerindang kitai Dayak laban sida tu udah chukup lama ba dunya pemerindang sereta liat endar ati ba pengawa ti dikereja sida. Aku chukup temegah nerima sida sebuat nyadi artis PBP”.

 

Bejadika Album – Tinggal Pengingat

 

Album Tinggal Pengingat udah dipenyadika kena 17 March 2013 ba siti palan Fun Fair di Bau. Maya nya, artis PBP bisi dikangauka orang merindang bala peminat ke bisi datai ngagai fun fair nya.

Entara artis bukai ke bisi datai malam nya iya nya artis Orang Ulu Daniel Danpa Danen, artis indu baru Valerie Thiam enggau Embat Lala empu. Malam nya, ZK Band merindang bala peminat sida enggau lagu ari album Tinggal Pengingat.

Naka ke diatu, lagu Tinggal Pengingat suah dipasang ba radio lalu tau dikumbai udah popular endar kelebih agi ba peminat muzik rock balada ke ditambahka enggau vokal Unan ke serak-serak basah sereta nyelai ari vokal penanyi bukai.

 

Peransang

 

Di Sarawak, artis beraban (band) nyau majak mayuh nyerumba artis solo. Taja pan pia, artis band ke bisi diatu tebal agi pemuzik lelaki laban artis band indu bedau tentu ngayanka diri. Populariti raban Candy dulu suba bedau tentu chukup kuat narit ati sida ke indu numbuhka raban muzik kediri ke nyangka bepun ari sida ke indu lebih nyamai nyadi vokalis band lelaki.

Ba industri pemerindang, nadai utai ke enda berubah nyengkaum populariti, pemayuh artis, genre muzik, trend lagu, filem tauka fesyen ba siti-siti timpuh. Utai ke nyadi enggau enda disadang tang dikerinduka mensia mayuh dikumbai kitai fenomena. Chunto ke pemadu manah iya nya fenomena Gangnam Style, siti muzik k-pop ari Korea enggau penanyi beidentiti tanda kuda, Psy.

Udah tu ila, kitai arap mayuh agi artis band indu laban sida nya tau meri sera baru enggau chura bebida ngagai industri. Enda milih artis band indu tauka lelaki, kitai mega arapka artis band makin ngerembai ari segi genre lagu enggau muzik sida. Nadai salah kitai ngetanka genre ke udah tang kitai mega patut ngemeranika diri nengkebang muzik baru laban bala peninga diatu udah landik milih (more selective) ari segang muzik luar ke mayuh didinga sida.

Kitai arapka penatai ZK Band ukai semina nyadi temuai ba industri muzik Dayak tang kitai arapka sida iya ulih mai chunto asil seni ke baru bepanggai ba peneleba enggau status OTAI ke udah chukup lama ba pengawa merindang. Siti program realiti TV di semenanjung ti tau endar nyadi ke chunto iya nya Sentuhan Idola, ke alai artis lama ngiring artis baru ba pengawa belagu enggau bemain muzik.

Pekara ke sebaka mega tau nyadi di Sarawak ditu dudi ila laban nya siti peluang artis lama (Otai) ngiring artis baru nyadi artis ke bekualiti.

 

Pesan ZK Band ngagai peminat lagu Iban

 

“Kami sebuat amat temegah ati laban diterima menijar besai PBP Pengajar Embat Lala nyadi artis iya. Nya alai,kami sebuat semampai enggau naka ulih ngaga lagu enggau muzik ke bisi identiti kami empu. Minta kasih mega ngagai bala peminat semua, sukung meh kami sebuat sereta kaban artis kitai bansa bukai. Anang meli VCD ‘cetak-rompak’ tauka VCD tiru. Selamat bekelala mega ngagai bala peminat ke apin ngelala kami sebuat. Sukung enggau bantu kita amat besai reti ba kami ke nyadi pemerindang tu. Munyi ku Pengajar Embat Lala empu, enti nadai peminat, nadai ga bala kami ke nyadi pemerindang tu”, ku Zaidie Kawang ngujungka jaku diri.

Kitai arapka album Tinggal Pengingat ZK Band terus diterima peminat lalu album nya udah tau dibeli ba semua kedai nyual VCD di serata Sarawak. Terima kasih besai mega ngagai Alex Ayong (penanyi lama ari kompeni The Winners, Sibu) ke udah bemurah ati meri aku info (penerang) pasal ZK Band.

Selamat nyendiaka diri ngintu pengerami Hari Gawai lalu beperindang meh enggau lagu-lagu gawai ti tau ngasuh kitai lantang sereta teperindang.