SIBU: Endang baka selama ninting taun, SK Nanga Ngungun nebing Sungai Ngemah mujur ngatur pengawa beripai meresi sekula nya apin lama ke udah.
Urung 198 iku kaban Serakup Apai Indai enggau Pengajar (PIBG) sereta bala nembiak sekula nya sama bela ngemujurka pengawa beripai nya.
Ku Kepala Pengajar sekula, Bundong Nibong ke mega ketuai ba pengawa beripai nya madah, kaul antara sekula enggau apai ulih dikedut sereta dikemanahka agi nengah pengawa ke diatur nya.
“Kami deka ngerembaika polisi pengelikun sekula.
Tu sebagi ari chara apai indai mantu sekula,” ku iya, seraya madahka pengawa beripai nya disukung semua kaban PIBG sekula nya.
Kelimpah ari meresi sekula, raban nya mega bisi ngaga pengawa bukai baka miki bangku enggau mija ke rusak.
SK Nanga Ngungun sebuah ari sekula keterubah endar ditumbuhka ba Sungai Ngemah.
Dua buah agi sekula ke bukai iya nya, SK Nanga Nirok enggau SK Nanga Jagau.
Niang Tuai Rumah Ijau Guyang menya mantaika langgur penemu iya ngagai opis loko otoriti numbuhka sekula nya dalam taun 1954.
Lima taun udah nya, sebuah rumah sekula arau begeladakka buluh sereta beatap apong mujur didiri.
Nangkanka nya, mensia mayuh ba rumah panjai nya lalu beripai ngaga dua buah kelas enggau dua buah rumah pengajar nambahka nya.
Kena 1 Januari taun 1960, sekula nya diberi nama ‘Sekula Primari Opis Loko Otoriti Nanga Ngungun’ (Local Authority Primary School Council Nanga Ngungun), lalu kelas ke dibuka bisi 65 iku nembiak enggau dua iku pengajar.
Dalam taun 1964, opis loko otoriti ngaga duah buah agi rumah pengajar enggau sebuah blok kelas.
Antara timpuh nya enggau taun 1987, majak mayuh blok rumah sekula enggau rumah pengajar digaga.
Nembiak ari rumah panjai nurun ke sekula nengah Sungai Ngeman.
Dalam taun 1991, sekula nya disambung karan, tang semina 12 jam dalam sehari, ari pukul 6.30 lemai nyentuk ke 6.30 pagi.
Kena 11 April taun 1996, Rajang Area Security Command (RASCOM) nyerahka rumah opis enggau 14 buah kuarters sida ngagai sekula nya.
Tengah taun 1996, blok kelas ke didirika dalam taun 1985 digaga nyadi buding nembiak.
Buding ke didirika dalam taun 1978 udah nya digaga nyadi lab sains enggau librari.
Dalam taun 2002, sekula tadika dibuka lalu ditangkanka enggau kelas pra- sekula.
Dalam taun 2007, sekula nya nerima karan 18 jam sehari iya nya ari pukul 2 lemai nyentuk ke pukul 8 pagi, sereta mega perengka Internet.
Diatu, kelimpah ari kelas primari satu nyentuk ke primari enam enggau pra- sekula, SK Nanga Ngungun mega bisi muka kelas ‘remedial’ dikena mantu nembiak ke tinggal ba pelajar.