Hari Pemereti Penemu Akademik SMK Simanggang dikearap ulih muka runding raban apai indai
SRI AMAN: Sekolah Menengah Kebangsaan (SMK) Simanggang deka ngatur Hari Permuafakatan Akademik SMK Simanggang taun 2013 ti diatur ba Dewan Rafflesia sekula nya kena 15 Jun tu berengkah pukul 7.00 pagi ngagai 12 tengah hari.
Penerang berita ari sekula nya madah, entara juluk atur program nya dikena ngerapitka kaul entara apai indai enggau piak sekula sereta meri peluang ngagai apai indai nemu dalam agi pasal penyulut akademik, kokurikulum enggau ulah anak sida.
“Program ti diatur kitai tu ke bendar sebengkah chara endur apai indai enggau pengajar betemu berandau, tu mega peluang apai indai nanya pengajar pasal penanggul ti ditapi anak sida di sekula.
“Ukai naka nya aja, nengah program tu mega, apai indai bisi peluang meda penylut anak sida sepemanjai setengah taun belajar di sekula tu,” ku penerang berita nya.
Nambahka nya dalam penerang berita mega bisi nyebut, nyerumba program nya ila bisi enam bengkah Institut Pelajar Tinggi Swasta (IPTS) deka ngambi bagi ba pengawa pemandang IPTS, ti nyengkaum Twintech Sarawak College, Swinburne University Of Tecnology Sarawak, Segi College, ICATS, Curtin University, Raven Education Services enggau Fortune Book Centre.
“Enam bengkah IPTS enggau sebengkah kedai bup ari Kuching dipelaba deka ngambi bagi ba pengawa Pemandang IPTS enggau nyual bup ti berengkah Hari Lima tu (14 Jun),” ku penerang nya.
Berindik ari pekara nya, apai indai sereta nembiak ti belajar ba sekula nya dipinta sama sampal datai ngagai program Hari Permuafakatan Akademik SMK Simanggang 2013.