KUCHING: Sarawak Workers Party (SWP) minta perintah bejalaika pengawa nitihka pelin ke deka ngaga sereta nembuka sebagi ari jalai alun ari Sibu ke Kapit dalam kandang dua taun.
Sapit presiden parti nya, George Lagong madahka diri semina deka meri terima kasih ngagai Datuk Seri Najib Tun Razak enti projek jalai nya udah tembu amat digaga ila.
Iya mansutka penemu munyi tu lebuh ngenang penerang ke dipansutka Menteri Besai kena Hari Minggu tu tadi ti ngungkupka belanja RM400 miliun dikena ngelengkaska pengawa ngaga jematan di Kanowit sereta nembuka jalai sepemanjai 33 kilometer nyentuk ke Song.
Kaban Kunsil Nengeri Pelagus nya mega madahka, parti iya semampai meri sukung ke penuh dikena nyempilka seraka pemansang entara menua pesisir enggau kandang nengeri.
“Beguna amat nyempilka arung pemansang menua pesisir enggau kandang nengeri kelebih agi ari segi perengkaguna, pengawa rama, ekonomi enggau pemansang ba pelajar.
“Seraka nya agi besai amat taja pan menua kitai udah merintah diri 50 taun,” ku iya lebuh berandau enggau pengarang berita ensanus.
Kelimpah ari nya, Lagong mega madahka SWP nyukung peminta ari ex-Chairman Democratic Action Party (DAP), Wong Ho Leng ti dekaka pemansang di menua pesisir dikereja enggau jampat.
Wong, ti ngemudika DAP Sarawak dalam ngelama 13 taun madahka, parti manggaika pekara nya ngagai rayat Sarawak, laban pengidup sida enda tau enda disungkak ukai semina ba kandang nengeri aja, tang nyentuk ke ulu entigis. Pengari rayat Bukit Assek nya bejaku munyi tu ba DAP 16th Ordinary Convention kena Hari Minggu tu tadi.
Sekalika sida begulai enggau Pakatan Rakyat (PR) betapi enggau Barisan Nasional (BN) ba pengawa bepilih menua dudi tu ila, Lagong madahka parti nya deka mantaika sapa kaban sida sepengudah aum ninting taun (AGM) ke deka diatur bulan baru tu.