Mawan nyadang MP ari SPDP diberi ungkup

0

Maya rintai menteri diubah dudi tu ila, Menteri Besai nemu bagi tangkup ke patut dipegai parti nya

KUCHING: Presiden Parti Progresif Demokratik Sarawak (SPDP) Tan Sri William Mawan nyadang kaban parlimen (MP) ari parti iya deka diberi mangku pengawa menteri maya ubah dalam tusun kabinet menteri ti deka datai.

“Menteri Besai nemu bagi ke patut ungkup SPDP, kitai mega nemu bagi ke patut ungkup diri.

“Meri pangku pengawa menteri ukai pengawa ke mudah lalu ukai mega diatur enggau tuju ti semina deka ngemantupka ati sesebengkah parti politik.

“Taja pia, ba randau enggau Najib dulu agi ari tu, aku pechaya kitai (SPDP) deka nerima ungkup pangku pengawa menteri maya ubah dalam tusun kabinet menteri ke deka datai,” ku Mawan.

Mawan mansutka jaku tu lebuh dikerandau pemberita pengudah ngulu sereta nyuaka perais ngagai pemenang Pekit Golf Amal Alumni UiTM Sarawak 2013 di Kelab Golf Sarawak ditu, kemari.

Seraya ti madah diri ke nyadi MP Saratok enggau Datuk Thiong (MP BIntulu) sigi enda diberi pangku pengawa menteri ketegal bisi komitmen bukai, Mawan madah kededua MP ari SPDP ke baru Anthony Nogeh (Mas Gading) enggau Anyie Ngau (Baram) patut diberi awak neleba ke diri ba parlimen dulu.

“Mangku pengawa menteri ukai pengawa ti mudah, mayuh raban menteri ke dulu sereta Menteri Besar di Semenanjung Malaysia ngembuan penau ti tinggi.

“Seduai (Nogeh enggau Anyi) patut ngambi awak neleba ke diri begulai enggau raban MP bukai bejaku ba parlimen sereta pengawa bukai ngambika enda dikeduan sengapa,”ku iya.

Sebedau pengawa bepilih besai ke-13, SPDP diarika Jelaing Mersat (MP Saratok) ke nyadi Sapit Menteri  Pengangkut sereta Dato Jacob Dungau Sagan (MP Baram) ke nyadi Sapit Menteri Dagang Antarbangsa enggau Industri.

Kededua seduai enda bediri ba PRU 13.