Penegap menua sekumbang merintah diri berindik ari sukung genap iku rayat: Taib

0

ANANG ENDA NEGEMERATKA PENYERAKUP: Jabu meda sekeda produk pemakai ke bisi dijual diatur pengawa Ngepunka Program Nyambut Minggu Penyerakup renggat Menua Sarawak Taun 2013, di Dewan Kpg Hijrah, Bako semak ditu, kemari. Sama bisi nguluka Jabu, iya nya Dr Hazland (belakang Jabu).

KUCHING: Pengelama urung 50 taun menua tu merdeka dalam Malaysia, rayat agi ulih ngetanka sebuah menua ke dipekunsi mangku pengawa perintah begempung enggau mayuh macham pupu raban bansa enggau jalai pengarap ke dikechuanka tuai-tuai ke dulu agi, diangkat sereta dipilih rayat Malaysia.

Kepala Menteri, Pehin Sri Abdul Taib Mahmud madah, penegap enggau penyerakup disukung  tiap iku rayat Malaysia.

“Dalam timpuh nya, menua udah ngatur diri ngasaika pemujur asil ari penegut penyerakup nya empu,” ku iya nengah teks jaku iya ti dibacha ulih Sapit Kepala Menteri Datuk Patinggi Tan Sri Alfred Jabu ba atur pengawa Ngepunka Program Nyambut Minggu Penyerakup renggat Menua Sarawak Taun 2013, di Dewan Kpg Hijrah, Bako semak ditu, kemari.

Iya madah taun tu menua Sarawak deka nyambut genap 50 taun menua tu merdeka begulai enggau Malaysia nyadi chunto ke pengabis manah ari sukut penyerakup bansa enggau kaul ke manah entara 26 pupu raban bansa enggau etnik di menua tu.

“Tang taja pia, bedau entu lama tu ke udah bisi sekeda orang ke enda ingat pemerat sereta beguna terus nyaga kaul penyerakup tu dataika iya ngachau penyerakup kaul pupu bansa.

“Taja iya baka nya, agi mayuh rayat Malaysia ke agi arap bepanggai ba penyerakup bansa di menua tu lalu ketegal nya nyekat tuju orang ke enda betanggungjawab nya,” ku iya.

Kelimpah ari nya, iya nambah siti agi pemerat kaul antara rayat bemacham pupu bansa di menua tu, iya nya pengawa kitai nyadi orang ke diau sepiak-sepiak enggau pangan diri (jiran).

“Ulah kitai ngagai orang sepiak-sepiak ke diau besemak enggau kitai nyadi pemerat ngagai isi sebuah penyerakup.

“Lebuh kitai bekelala enggau orang sepiak kitai lalu ngembuan kaul ke manah enggau orang sepiak kitai, kitai baka diri sebilik, alai kaul penyerakup di renggat sebuah sitak genturung pendiau baka sitak ‘Rukun Tetangga’ deka di tumbuhka,” ku iya.

Kaul ke manah entara sitak ‘Rukun Tetangga’ di dalam sebuah pelilih menua negutka agi kaul penyerakup di dalam pelilih menua nya, lalu berindik ari nya nuju ngagai renggat ke besai agi, iya nya penyerakup komuniti Malaysia nya empu.

“Kitai ngembuan ulah ke meretika ulah pangan diri, bebasaka adat pesaka enggau pengarap mayuh macham pupu bansa di menua tu, udah mantu kitai nyaga pengelikun, lalu ngamatka peneka menua dalam japai politik enggau ekonomi ke maju,” ku iya.

Iya nambah, program kerejasama komuniti di renggat kampung, genturung pendiau, komuniti, pelilih menua, menua enggau kebangsaan diperambu enggau silik.

Perintah mega sanggup bebelanja lalu ngeluarka ungkup ke mayuh kena ngemujurka program penyerakup, ku Taib.

“Iya betuju beratika tuju pengelikun enggau penyerakup ulih ditanka nyamin pemansang ekonomi enggau (kestabilan) politik ulih dijapai.

“Ketegal nya, udah nyadi tanggungjawab semua rayat Malaysia sama-sama nyaga pengelikun nya,” ku iya.

Maya atur pengawa nya kemari, Jabu ngarika Kepala Menteri meri ungkup RM15,000 ngagai KRT Kg Hijrah Bako enggau RM15,000 agi diberi ngagai Kelab Mutosikal Bekuasa Tinggi Sarawak.

Sama bisi ngulu atur pengawa nya kemari, Direktor Opis Penyerakup enggau Integrasi Nasional (JPNIN) Sarawak Dirwana Azool, Sapit Ketuai Direktor (Perambu) JPNIN Malaysia, Ho Khek Hua enggau ADUN Demak Laut Dr Hazland Abang Hipni.