Thursday, October 22

Program MDAB UiTM dikearap ulih ngubah pengidup, pengelantang anak bumiputera

0

PENGGI NUAN: Mawan nyuaka perais nagagai seiku pemenang. Bela dipeda Jamil (kiba).

KUCHING: Sepenyampau RM45 ribu mujur digempuru ungkup Program Mengubah Destini anak Bangsa Universiti Teknologi Mara (UiTM) Sarawak ba Pekit Golf Amal Alumni UiTM ke diatur di Kelab Golf Sarawak ditu, kemari.

Program Mengubah Destini anak Bangsa (MDAB) diatur enggau tuju mantu raban nembiak bumiputera ke kurang penatai pemisi nampung pelajar renggat tinggi di UiTM.

Rektor UiTM Sarawak Dato Dr Jamil Hamali madah program MDAB meri awak ngagai nembiak ke enda bangat nyulut dalam peresa ketegal pemerinsa pengidup ngambika ulih nampung pelajar ngagai renggat ke tinggi agi.

“Enti raban nembiak tu enda dibantu sereta diberi awak, sida iya engka deka tekuing ngagai pengawa tauka ulah ti enda manah.

“Nengah program MDAB, sida iya deka diembing ngambika ulih ngubah pengidup diri sereta ruang bilik nyadi pengidup ke menyana,”ku iya maya bejaku ba pengerami nyuaka perais ngagai pemenang,

Pengawa nya kemari digulu Menteri Kanan Tan Sri William Mawan.

Sepenyampau 95 iku pemain golf ke datai ari sekeda pampang UiTM sereta menua enggau bepekit kelimpah ti meri bantu ungkup program MDAB.

RM20,000 mujur digempuru ari raban penyereta ke alai Mawan ti ngarika Opis Pemansang Sosial bisi mega meri RM15,000.

Program MDAB mega nerima bantu RM10,000 ari Teguh Amani ti disua Rashid Abas.

Semua bantu nya diterima Jamil ti ngarika UiTM sarawak.

Bela datai Menteri Kereja Raya Datuk Fadillah Yusuf sereta Ketuai Sekretari Politik Kepala Menteri Abdullah Saidol.