KUCHING: Gerempung ex- Polis Malaysia Pampang Sarawak (PBPMS) minta orang mayuh, kompeni besai enggau ijinsi perintah mantu gerempung nya kena ngulihka duit belanja ke pengelantang pendiau ex-polis, kelebih agi sida ke raya sakit.
Sapit Chairman PBPMS Jack Joni madah geran ke diberi perintah ninting taun semina RM3,000 aja sebulan, enda chukup kena nampung belanja ninting taun gerempung sereta mantu ex-polis ke raya sakit.
“Mayuh ke raya sakit tang enda ulih dibantu laban kurang duit. Semina utai ke ulih digaga kami, ngabas sida ke sakit di rumah tauka di sepital lalu meri sukung moral ngagai sida.
“Enti ngarapka duit ringgit endang kami enda ulih. Baka enti bisi kaban ex- polis ke nuchi buah pinggang (dialysis), kami semina diasuh betuchi buah pinggang di Briged Polis (PGA) aja. Nya pan enti bisi surat sukung ari gerempung lalu Opis Menteri Dalam Menua (KDN) ke mayar kos berubat,” ku iya.
Iya madah baka tu ba aum media di PBPMS Jalai Rubber ditu, kemari.
Iya nambah, baka opis alai sida kediatu, iya endang rumah kedai enggi PBPMS (tiga ringkat). Dua ringkat disuwa ngagai orang.
“Taja disuwa, duit tetap enda chukup kelebih agi enti duit nya beguna endar kena mantu ex-polis ke sakit tauka meri belanja kena anak ex-polis ke deka besekula tinggi,” ku iya.
Taja pia, ku Jack baru, ari empat taun ke udah KDN lalu bedau meri bantu sida iya ngagai gerempung tu taja pan udah minta ngagai opis menteri nya empu.
Utai ti beguna bendar, iya nya ‘Bantu Khairat Pemati’, bantu masuk universiti kena anak ex-polis sekula enggau berubat, datai ke sehari tu ku Jack, nadai sebarang timbal ari KDN.
Berindik ari nya ku Jack, PBPMS deka ngatur pengerami makai lemai pengasih, “Malam Jasamu Dikenang” kena 24 Ogos tu ila di Hotel Riverside Majestic Kuching, lalu dijangka Kepala Menteri Pehin Sri Abdul Taib Mahmud ti mega nyadi patron deka bejadika atur pengerami nya.
“Pengerami nya digaga, ngambika ulih ngumpul mayuh agi duit ari mensia mayuh ke gerempung tu,” ku iya.
Bala kaban PBPMS ngarapka jemah ila sida deka bulih opis kediri empu.
Lebuh ditanya bisi enda gerempung nya minta bantu berubat nengah Bantuan Tabung Amanah Warisan Polis (TAWP), ku Jack:
“Baruh KDN, 6 pekara ti patut dikemeratka lalu bisi sekeda nya udah diketuka baka bantu kena meli cheremin mata. Bantu dalam TAWP baka Bantu Khairat Pemati, Bantu (Pergerakan) kena berubat tauka kena meli perengka guna maya sakit baka kerusi roda, ‘walking frame’, kaki pelesu enggau utai bukai, bantu kena berubat, bantu kena belajar enggau bantu ke sida ke kena tinggang tasah,” ku iya.
Tandu Jack, bantu RM1,000 (sekali bayar) nya pan nyau, 2 tauka 3 taun baru bisi, bantu masuk universiti RM3,000 lalu bedau diberi ngagai sida ke patut. Bisi lebih 2,000 kaban PBPMS enda nemu pasal tu lalu nadai dipadah ulih KDN sapa ke nerima bantu baka tu.
Kediatu, pemayuh ex-polis ke udah ngerejister bisi 4,100 ke mayuh agi ari kaban nya sida ke bepangkat mit enti dibanding antara 8,000 nyentuk ke10,000 di serata menua Sarawak.
“Ari pemayuh nya, enda mayuh sida ke bepangkat besai masuk gerempung tu ketegal bisi pengawa bukai enti sida iya udah pinchin,” ku iya lalu madah Aum Besai Ninting Taun (AGM) gerempung nya deka di atur dalam taun 2014.