SRI AMAN: Menteri Muda Pemansang Menua Pesisir enggau Pekara Berumah Datuk Francis Harden Hollis (gambar)madah servis Opis Pengerara Api enggau Penyah Penusah (bomba) majak beguna ba raban mensia mayuh kemaya hari tu.
Tu berindik ari pengawa nyelamatka nyawa enggau reta tengkira ti bepanggai ba pengelandik servis bomba nya, ku iya.
Ku Harden, endang nyadi tanggungpengawa perintah nyaga pengelikun nyawa enggau reta tengkira tetiap raban bansa kelimpah ti ngemataka pengidup rayat ninting maya.
“Berindik ari nya, servis bomba patut dikemeratka perintah kena nyaga pengelikun enggau pengelantang semua,” ku iya.
Harden ke mega Kaban Kunsil Nengeri (ADUN) Simanggang madah munyi nya ba pengerami ngelalu penatai pengabang Gawai Dayak renggat perintah nengeri, Opis Bomba enggau Penyelamat Malaysia (JBPM) ditu, bedau lama ke udah.
Ba pengerami tu Harden ngerahka agih sepenyampau RM5,000 ngagai JBPM Zon Sri Aman.
Kelimpah ari nya ku Harden, tanggungpengawa raban bomba diatu ukai agi semina madamka api maya penusah angus nyadi tang mantu mutarka penyah penusah baka ampuh bah, tanah runtuh, tsunami, ribut kudi enggau utai bukai.
“Aku minta semua pegawai enggau raban bomba ngemeranka ulah baka nya kena nentuka servis ke dipinta kelebih agi rayat ba Sri Aman enggau Sarawak,” ku iya.
Bisi mega datai Pengarah JBPM Nengeri Sarawak Nor Hisham Mohammad, Ketuai JBPM Zon Sri Aman Azhar Mohammad, Nelson Gemong ke nyadi pengari Kaban Parlimen Sri Aman Masir Kujat, bala pegawai enggau raban bomba di menua tu.