KUCHING: Opis Dagang Betanam Betupi Perintah Besai (FAMA) deka nyendiaka servis bas ungkup mensia mayuh nuju Palan Dagang Satok dalam awak ke semak tu.
Direktor FAMA Paza Dan madahka opis ke dikuasa iya diatu benung berunding enggau sebuah kompeni bas ngambika tau ngatur pejalai bas nuju palan nya.
“Servis bas pulai mansang nuju Palan Dagang Satok benung diperunding maya ke diatu.
“Kitai nyadang servis bas tu ila ulih matak mayuh agi orang datai bebelika barang sereta pemakai di palan tu.
FAMA mega bisi minta Opis Kereja Raya (JKR) nyendiaka sebuah palan penyangkai bas ditu,”ku Paza.
Iya mansutka jaku tu ba Program Ngiling Tikai Palan Dagang Satok ti diatur di Blok C palan nya ditu, kemari.
Seraya ti madah atur nya ila tau endar nambah panatai pemisi orang dagang ba palan nya, Paza netapka mayuh agi program deka diatur enggau tuju ngelakuka palan nya.
Paza mega ngansak orang dagang semampai begempung enggau FAMA ke nyadi ijinsi ngintu pemaik Palan Dagang Satok ngambika semua penanggul ulih diputar enggau manah.
“Nuju orang dagang di Blok B, C, D, E enggau plaza. . . enti bisi napi sebarang penanggul anang enda betanya ngagai pemesai kami di opis FAMA ti besemak ditu.
“Kitai ulih berandau enggau manah ngambika penanggul nya muntang diputar lalu mulaika pemaik ngagai semua,”ku iya.
Ngenang senentang agih belanja RM13.
5 juta ti diberi perintah besai maya penemuai Sapit Menteri Besai bedau lama tu tadi, Paza madah duit nya deka dikena nambah perengka guna di palan dagang nya.
Ku iya, belanja nya deka dikena ngaga jalai sereta nambah palan endur ngengkah entukar kelimpah ti nyendiaka atap ngagai sekeda palan ti enda beratap maya ke diatu.
Bemacham pengawa ungkup orang dagang sereta mensia mayuh diatur ba Program Ngiling Tikai nya kemari.
Raban pengabang diperindang enggau tanda ajat Iban enggau Bidayuh kelimpah ti begempuru makai.