BCF 2013: Mensia mayuh dipinta ngambi bagi ba Pekit Betabuh

0

SIBU: Mensia mayuh ditangkan ngambi bagi ba Pekit Betabuh beserimbai enggau Pengerami Mantaika Main Asal Dayak Borneo (BDCF) maya Pengerami Mantaika Main Asal Borneo (BCF) 2013 ti deka datai.

Pekit tu deka belabuh pukul 8 lemai kena 29 Jun tu ba Panggau Dayak.

Nitihka penerang ari pengari komiti pekit tu, Ambrose John, pekit tu nadai bebayar lalu seiti tim disempulang lima iku raban.

“Ari penyampau tubuh ke ditatak tu, seiku entara sida aruh ngajat.

“Lalu pengelama seiti-seiti tim mantaika pengelandik iya nya empat minit aja,” ku iya madah ngagai pengarang berita, kemari.

Ambrose madahka poin diambi ari pemanah munyi enggau rentak tabuh (50 persin), ngepan (20 persin), kreativiti (15 persin) sereta pemuka enggau pengujung tabuh (15 persin).

Perais ungkup champian pekit tu iya nya mata duit RM600 sereta disempulang tropi enggau setipikit.

Penuduk lumur dua deka mai perais mata duit RM500, tropi enggau setipikit lalu penuduk lumur tiga mai pulai perais mata duit RM400, tropi enggau setipikit.

Perais sagu ati ungkup penuduk lumur empat ngagai enam deka mai pulai mata duit RM150 enggau setipikit.

Berindik ari nya, bala mayuh ke deka ngambi bagi ba pekit tu tau ngambi pom ba Ambrose empu tauka betelefon ngagai iya nengah lumur 016-893 1385 enggau Steven Rom (013-818 3855).

Pom ke udah tembu enda tau laun dianjung ngelui 28 Jun, pukul 8 lemai.