Indu Dayak dara rumpas diperansang masuk Pekit Kumang ke diatur nyerumba BCF 2013 tu

0

SIBU: Indu Dayak ke agi rumpas dalam kandang umur 18 ngagai 30 taun diperansang ngambi bagi dalam Pekit Kumang, ke deka diatur kena 2-4 Julai ba Sibu Town Square.

Pekit nya diatur ba panggau Dayak nyerumba Pengerami Main Asal Borneo (BCF) ke deka berengkah kena 28 Jun lalu tembu 7 Julai.

Chairman pengatur pekit, Angelyn Uchi Maseng, madahka semina sida ke ngembuan peninggi ambis kurang lima kaki dua inchi tau ngambi bagi.

Raun keterubah deka diatur berengkah ari pukul 7.30 malam kena 2 Julai. Semi final kena 3 Julai lalu tikas final kena 4 Julai.

Uchi bejaku ba aum media kemari madahka orang ke nyadi champian deka bulih perais mata duit RM1,000 seraya lumur dua RM800 lalu lumur tiga RM600.

Orang ke bulih lumur empat enggau lima deka pulai mai mata duit RM200.

Perais sinu ati RM150 nganti lima iku sida ke bukai.

Uchi madahka maya pekit final, sida finalis enda tau enda ngena ngepan asal Iban, Orang Ulu tauka Bidayuh.

Orang indu ke deka enggau masuk pekit nya aruh nganjung pom sida ambis laun kena 25 Jun tu. Masuk pekit enda bebayar.

Penerang ke silik tau diambi ari Uchi ba lumur 016-8825861/084-336077 tauka Rose Chukan (013-8313990) tauka Claudia Dieo (019-8346803).