BETONG: Kolej Vokasyenal Betong deka ngatur ‘Local Outreach’ kena 23 Jun tu berserimbai enggau ‘Jelajah Kolej Vokasional 1 Malaysia Zon Sarawak’ di Peliling Menara Jam Betong.
Penerang media ari Kolej Vokasional Betong sehari tu madahka, program tu diatur dikena ngelaluka pelajar teknik enggau vokasyenal.
Ku penerang nya, sekeda ari tuju ke bukai nya tu nyadika penepan ngambika muka mata mensia mayuh ke pemesai guna pelajar vokasyenal ngagai mensia mayuh.
Pengerami nya deka dipenyadika Sapit Kepala Menteri Sarawak, Datuk Patinggi Tan Sri (Dr) Alfred Jabu anak Numpang di Dewan Panglima Rentap berengkah pukul 8 malam.
Program hari nangkanka nya dia alai konvoi ‘Jelajah KV 1 Malaysia Zon Sarawak’ ngetu lalu mega deka ngatur program ke sebaka di Bandar Saratok di Dewan Sri Krian, Saratok enggau Sarikei.
Berindik ari nya nembiak tembu SPM diundang datai ngulu program tu lalu sekeda Institut Latih di baruh Opis Pemansang Pengelandik deka bisi enggau dia ba genap tempat ke dilawa.
Penerang ke silik tau diambi ari Darrell Dennis Andrew ke lalu nyadi Chairman Pengatur Program nengah lumur 013-5712625 enggau Sapit Chairman Sangin Juat ba lumur 01115861331.