KUCHING: Menteri Muda Rampa Menua Datu Len Talif ngansak mensia mayuh ngetuka pengawa nunu maya ke diatu dikena ngurangka sebun asap ti majak nambah di nengeri tu.
Ku iya, ari pansik ti dipejalai raban pemesai di Opis Menteri Pengeraja Asal enggau Rampa Menua (NREB), tebal agi asap nya datai ari pengawa nunu ti dikereja mensia mayuh di serata nengeri.
“Pemesai ari NREB deka matau pekara tu ba serata nengeri ngambika penusah sebun asap tu enda majak nambah. Tu meh pekara ti dikemerat lalu deka diintu enggau manah.
“Miri, Sibu, Kuching, Bintulu enggau Sri Aman benung betapi enggau sebun asap ke alai kitai nyadang penusah tu deka diasai semua dalam timpuh dua minggu tu,”ku iya seraya ti madah gaya hari ti angat sereta rangkai nambahka agi penusah nya.
Iya mansutka jaku tu lebuh dikerandau pemberita pengudah nutup ‘Program Kesedaran Industri Pelajar Sekolah’ ti diatur di Dewan Suarah ditu, kemari.
Iya mega madahka semua peremit nunu ti udah dikeluar NREB dulu agi ari tu deka dibatak pulai nyentuk ke gaya pendiau hari berinsur manah.
Taja pia, Len netapka penusah langit dibungkur sebun asap di Sarawak mengkang ba tikas ti enda bangat ngirauka ati lalu perchaya pekara tu ulih diintu enggau manah.
Maya pukul 11 pagi kemari, Kuching ngerikut bacha sebun asap ba tikas 83 lalu mengeri Miri ngerikut bacha 88 (pemadu tinggi).
Penusah sebun asap tu diberitaka nyadi ketegal sekeda kampung di menua Indonesia udah balat angus lalu sebun nya dibai angin nyentuk ke Semenanjung sereta Singapura.
Mengeri Muar di Johor kena Hari Empat tu tadi nyapai bacha ikas 370 ti ngujungka sekeda sekula diasuh tutup.