Sekumbang dua taun ke udah, urung 200 peranak lima buah rumah panjai betapi enggau penanggul nadai ai
SIBU: Peranak lima buah rumah panjai ka pan enda dani dini hari urung pukul 3 pagi laban nimbun ai ba paip bomba ke bepalan ba simpang rumah panjai sida sereta beratur panjai enti sema mayuh orang sama deka nimbun ai maya nya.
“Ai ba paip bomba tu semina ulih dikena berengkah ari pukul 3 pagi nyentuk ke 5 pagi aja. Udah nya, nadai ulih nimbun ai agi, nya ti ngujungka mensia mayuh pansut magang laban deka nimbun ai ari tumu pagi keguna bala anak ke deka nurun sekula, berapi, mandi enggau utai bukai.
“Enti enda nimbun ai ari tumu pagi, kami nadai ai ke deka diguna sepemanjai hari lalu kami ditu nadai pilih bukai,” ku pengari peranak lima buah panjai nya Ambrose Neli madah ngagai Utusan Borneo, kemari.
Ku iya, sida ke bisi urung 200 iku ari lima buah rumah panjai di Ulu Ranan, Kanowit semak ditu nadai ai sekumbang lebih dua taun ke udah.
Rumah-rumah panjai nya urung satu kilometer ari simpang Sekolah Kebangsaan (SK) Ulu Ranan iyanya Rumah Kawi Umpang, Rumah Tanjong Jali, Rumah Kudi Berangka, Rumah Jepun Juwing enggau Rumah Akat Saging.
Tandu iya, penanggul nya kala dikenataika ngagai raban ke bekaul tang nadai nerima timbal ke manah.
“Pemedis kami berasai amat kelebih agi maya datai musin kemarau. Kami kala minta bantu ari piak ke bekaul.
“Piak nya sebedau tu kala nganjung ai ngena lori tangki ngagai kami, tang ai nya mega enda berapa beresi. Kami enda lantang ati piak nya nyendiaka bekal ai ke enda beresi ngagai kami,” ku iya.
Sama bisi nyempulang Ambrose iyanya Tuai Rumah Kudi Berangka enggau Sapit Tuai Rumah Akat Saging, Aorian Murris.
Ambrose madah, bisi mega peranak menua nya ngelawa pasar Kanowit laban deka ngulihka ai beresi ba Pasar Basah Kanowit ngena tambang sepenyampau RM4.
“Sida ke ulih (bisi gi duit) sereta bisi kerita nadai napi penanggul, tang bagi sida ke enda ulih bakani deh? Pekara nya ke patut diperatika wakil rayat kami ditu.
“Bedau lama tu tadi, aku kala berandau enggau seiku wakil rayat ditu senentang pekara nya. Kami mega kala betemu enggau piak ke bekaul, tang sida madah enda ulih ngaga apa nama. Utai tu bangat ngemediska kami,” ku iya.
Ditanya bisi ke nadai sungai ke besemak, iya madah endang bisi Sungai Ranan, tang ai balat kamah ketegal musin kemarau lalu bangat enda ulih dikenyadi dikena irup tauka mandi.
Berindik ari nya, iya minta dua wakil rayat ba menua sida nya ngambika ulih meda kediri empu ngagai rumah panjai sida gaya penusah ke ditapi sida lebuh maya nadai ai.
Nyerumba enggau nya mega, iya arapka piak ke bekaul ulih nyendiaka Tangki Ai 1Malaysia ke bisi ai ngagai sida enggau naka pengelengkas.
“Kami minta piak betanggungjawab mutarka penanggul kami ditu,” ku iya.