Wednesday, April 24

Menti nerima kelala ari perintah menua

0

KUCHING: Esmelda Arecia Menti Alfred Geling (gambar) majak nerima kelala ari perintah nengeri udah iya diangkatka nyadi Atlit Indu Pengabis Nyulut dalam Sukan Malaysia (SUKMA) XVI Kuala Lumpur.

Gimnas beumur 13 taun nya nerima insentif penyampau  RM19,750 udah iya mujur bulih dua iti midul emas, tiga iti midul pirak enggau seiti engkeraju kelimpah diangkatka nyadi Atlit Indu Pengabis Nyulut.

Kali ke penudi atlit Sarawak ke diangkatka nyadi Atlit Indu Pengabis Nyulut SUKMA nya dalam taun 1990 nengah atlit nyemerai, Tania Bugo di Kuching.

Nundaku Esmelda, pemujur iya ari nya luar sangka iya laban iya masuk pekit dalam SUKMA nya semina deka ngulihka peneleba.

“Aku semina ngining beberapa midul aja. Nadai nyadang diangkat nyadi Atlit Indu Pengabis Nyulut,” ku iya ke mengkang besekula di Sekolah Menengah kebangsaan (SMK) Batu Lintang.

Iya anak tuai ari sida tiga iku diri menyadi nyebut pemujur ke ditempa iya nya niup semengat ngambika teulihka pemujur ke besai agi ba SUKMA jemah ila.

SUKMA kontinjen Sarawak taun tu ngeraup empat iti midul emas, semilan pirak engau lima engkeraju.