Sunday, July 21

Operasi SAR disambung nyentuk ke nanga Sungai Suai

0

SEMAMPAI NGANTI: Sekeda ari peranak rumah panjai nganti ba tebing ai ngicha bisi nemu berita ari raban ke benung begigaka tudah Julai Melina.

MIRI: Operasi begiga enggau nyelamat (SAR) seiku orang berikan ke diriputka lenyau lebuh ke nyala di Sungai Pabong Besar, Suai, Niah kena malam Hari Enam tu tadi disambung baru pagi kemari lalu sekali tu bungkur operasi nya nyentuk ngagai nanga Sungai Suai.

Operasi ke udah masuk hari ketiga mega dipasuk enam iku polis, lima iku ari Opis  Bomba  Miri, lima iku ari JPAM Miri enggau 10 iku kaban RELA.

Ku pengari polis madah,  operasi nya mega dibantu 60 iku peranak rumah panjai ke begunaka 20 buah perau panjai.

“Kenyau ari hari kedua, pengawa begiga enggau nyelamat mansa udah dipejalaika ngelingi kandang endur mansa ke lenyau lalu diatu nyau naka nanga Sungai Suai,” ku iya lebuh ke dikerandau Utusan Borneo kemari.

Taja pia ku iya, nyentuk ke operasi diketu jam 6 lemai kemari, raban begiga bedau tetemuka mansa tauka tanda-tanda sekalika iya endang amat ditagup jelu ai nya, lemas tauka tesat.

Dalam penusah ke nyadi malam Hari Enam tu tadi, mansa, Julai Melina, 34, maya pukul  9 malam mansang begiga enggau petunggal iya, Henry Santap Dana, 33.

Tang urung pukul 12 tengah malam, Henry meda perau mansa bisi ba  tebing anak sungai tang nadai meda batang tubuh iya. Udah puas begiga tang enda tetemu iya mulaika diri lalu bepadah.

Kenyau ti ngentap pendiau di genturung menua nya bulan Mei tu tadi, Julai ke beruang bilik enggau Nabila, 23, bisi seiku anak lelaki umur dua taun udah kala gawa  nyadi tukang welding di Miri.