SIBU: Piak pengatur Pekit Betabuh ungkup raban bansa Dayak ba Borneo Cultural Festival (BCF) udah diasuh nambahka perais mata duit dalam pekit nya.
Stephen Chendang ari Sungai Bawan di Kanowit madah perais duit nya enda umbas ke tambang udah bekau dipedua antara tubuh sida ke ngambi bagi.
Perais nya RM600, RM500 enggau RM400 ungkup champian, lumur dua enggau lumur tiga,” ku iya.
“Tim kami ke ngumbai diri Bujang Lelayang, nyadi champian ba pekit ke diatur bedau lama ke udah.
“Aku pechaya enti sema perais duit nya ditambah, piak pengatur deka matak mayuh agi tim ngambi bagi taun nyin ila,” ku iya.
Ku Stephen, semina empat tim bisi ngambi bagi dalam pekit nya taun tu tadi.
Iya mega bekenangka perais mata duit ungkup pekit Kumang enggau Keling.
“Nama kebuah Keling ke menang tempat lumur satu bulih RM2,000 lalu Kumang semina RM1,000?
“Ku aku piak pengatur aruh ngeletak perais mata duit ke sama penyampau,” ku iya.