Meri pemanah ngagai ketuai Dayak ngena atur ke baru mutarka penanggul tanah ke ditapi raban komuniti nya
KUCHING: Mandal Presiden 1 Serakup Bansa Dayak Sarawak (SDNU) Anthony Banyan kemari minta undang-undang tauka akta tanah dipekemaska baru.
Ku iya, pengawa nya patut bepelasarka pemutus ke udah digaga Kot Perintah Besai ti madahka tanah adat asal Bumiputera (NCR) enda ulih dipenggi orang bukai nengah sempekat jual enggau beli (SAP).
Anthony madah, nya deka meri pemanah enggau penguntung ngagai semua ketuai Dayak ngena atur ke baru (pengudah dipekemaska baru) kena mutarka penanggul tanah ke ditapi raban komuniti nya.
“Undang undang bekaul enggau NCR patut dipekemaska baru ngambika raban bansa Dayak ulih nitihka atur tauka undang-undang ti engkeman ba menua tu,” ku iya.
Nitihku Anthony, bisi pengelebih enggau pengurang pemutus ke dibantaika Kot Perintah Besai nya.
“Pengurang, iya nya tanah NCR nadai rega. Semua pengawa numbuhka kebun ngena chara kunsi (JV) dipelabaka tau ngeruga syarat atur nya laban ngelanggar undang undang. Enti amat utai tu nyadi, semua tanah NCR ke dikemansang ngena chara JV enggau tanah NCR direnchah kena ngaga projek pemansang mesti ditikal pulai baru ngagai pengempu tanah NCR,” ku iya.
Ba pengelebih, ku iya pengempu tanah andal status NCR ba atas tanah sida ulih ditan ngambika enda senang dirampas sereta ulih nentuka penyampau syer ba atas tanah sida ngambika enda nyadi mit.